ភ្នំពេញ៖ អគ្គនាយកដ្ឋានពន្ធដារនៃក្រសួងសេដ្ឋកិច្ចនិងហិរញ្ញវត្ថុ បានសម្រេចពន្យាការអនុវត្តន៍ពន្ធលើចំណេញមូលធនរយៈពេល ២ឆ្នាំទៀត រហូតដល់ថ្ងៃទី១ ខែមករា ឆ្នាំ២០២៤ ដើម្បីជំរុញកំណើនសេដ្ឋកិច្ចកម្ពុជាក្នុងការរស់នៅជាមួយកូវីដ-១៩។
ក្នុងសេចក្ដីជូនដំណឹងចុះថ្ងៃទី៩ ខែមីនា ឆ្នាំ២០២២ អគ្គនាយកដ្ឋានពន្ធដារបានសម្រេចដោយមានចំណារពីនាយករដ្ឋមន្ត្រីកម្ពុជា ក្នុងគោលដៅចូលរួមអនុវត្តក្របខណ្ឌយុទ្ធសាស្ត្រ និងកម្មវិធីស្តារ និងជំរុញកំណើនសេដ្ឋកិច្ចកម្ពុជា ក្នុង ការរស់នៅជាមួយកូវីដ-១៩ តាមគន្លងប្រក្រតីភាពថ្មី សម្រាប់ឆ្នាំ២០២១-២០២៣ របស់រាជរដ្ឋាភិបាលដើម្បីជំរុញការវិនិយោគ។
យោងតាមប្រកាសស្ដីពីពន្ធលើចំណេញមូលធន ពាក្យ «ចំណេញមូលធន» សំដៅដល់ ប្រាក់ចំណូលជាប់ពន្ធដែលបានពីការយកចំណូលពីការលក់ ឬផ្ទេរមូលធនដកការកាត់កងចំណាយដែលអនុញ្ញាត។ «មូលធន» គឺសំដៅដល់ អចលនទ្រព្យ ភតិសន្យា ទ្រព្យវិនិយោគ កេរ្តិ៍ឈ្មោះអាជីវកម្ម កម្មសិទ្ធិបញ្ញា និងរូបិយវត្ថុបរទេស៕