រតនគិរី : នៅថ្ងៃអាទិត្យ ទី៣០ ខែឧសភា ឆ្នាំ២០២១ រដ្ឋបាលខេត្តរតនគិរីបានប្រកាសរកឃើញករណីវិជ្ជមានកូវីដ-១៩ ចំនួន០១នាក់មានឈ្មោះ ឈឿន រដ្ឋា ភេទប្រុស អាយុ២៥ឆ្នាំ ជនជាតិខ្មែរ មានទីលំនៅអចិន្ត្រៃយ៍នៅភូមិ៦ ឃុំត្រែងត្រយឹង ស្រុកភ្នំស្រួច ខេត្តកំពង់ស្ពឺ មុខរបរអ្នកបើកបររថយន្តដឹកជញ្ជូនទំនិញធុនធ្ងន់នៃក្រុមហ៊ុនML នៅរាជធានីភ្នំពេញ។

រដ្ឋបាលខេត្តរតនគិរី បានបន្តថាបុរសឈ្មោះ ឈឿន រដ្ឋា បានចេញដំណើរពីក្រុមហ៊ុន ML ឆ្ពោះទៅកាន់ក្រុងប៉ោយប៉ែត ដើម្បីដឹកទំនិញនៅថ្ងៃទី២៨ ខែឧសភា ឆ្នាំ២០២១ ជាមួយបងឈ្មោះ ឯម វិត ភេទប្រុស អាយុ៣១ឆ្នាំ ជនជាតិខ្មែរ ហើយនៅថ្ងៃទី២៩ ខែឧសភា វេលាម៉ោង៦,០០នាទីល្ងាច បុរសទាំងពីរនាក់បានចេញដំណើរដឹកទំនិញពីក្រុងប៉ោយប៉ែតសំដៅមកខេត្តរតនគិរី។

រដ្ឋបាលខេត្ត បានអំពាវនាវដល់ប្រជាពលរដ្ឋដែលបានប៉ះពាល់ដោយផ្ទាល់ សូមរួសរាន់មកជួបក្រុមគ្រូពេទ្យ និងធ្វើចត្តាឡីស័ក ដើម្បីយកសំណាកទៅពិនិត្យ និងអ្នកប៉ះពាល់ដោយប្រយោលជាមួយអ្នកវិជ្ជមានជំងឺកូវីដ-១៩ សូមរួសរាន់ធ្វើចត្តាឡីស័កតាមផ្ទះក្នុងក្រុមគ្រួសាររៀងៗខ្លួនដោយមិនត្រូវពាក់ព័ន្ធនិងប៉ះពាល់ជាមួយអ្នកដទៃជាដាច់ខាត។

រដ្ឋបាលខេត្តរតនគិរី បន្តទៀតថាប្រសិនបើប្រជាពលរដ្ឋមានរោគសញ្ញា ផ្ដាសាយ ក្អក ហៀរសំបោរ ឈឺបំពងក ថប់ដង្ហើម ឬរោគសញ្ញាសង្ស័យផ្សេងៗ សូមទៅពិនិត្យសុខភាពនៅតាមមន្ទីរពេទ្យ ឬមណ្ឌលសុខភាព ដែលស្ថិតនៅជិតកន្លែង ដែលបងប្អូនស្នាក់នៅនិងរាយការណ៍ជូនអាជ្ញាធរមូលដ្ឋានជាបន្ទាន់៕