អង់គ្លេស៖ ខ្សែប្រយុទ្ធអាល្លឺម៉ង់ Kai Havertz បាននិយាយនូវពាក្យមួយឃ្លាទៅកាន់អ្នកគាំទ្រ ក្រោយពីគេបានរួមចំណែកយ៉ាងធំធេងក្នុងការឈ្នះពាន UEFA Chmapions League យប់មិញនេះ ដោយស៊ុតបញ្ចូលទីក្រុមមេឃខៀវ Manchester City និងបញ្ចប់ការប្រកួតដោយជ័យជម្នះ ១-០ នេះតែម្តង។

Havertz ស៊ុតបញ្ចូលទីក្រុម Man City មួយគ្រាប់នៅនាទី ទី៤២ ដែលជាគ្រាប់បាល់ដំបូងបង្អស់របស់គេក្នុងពាន UEFA Champions League ជាមួយ Chelsea ហើយនាំឱ្យក្លិបឈ្នះពានកំពូលទ្វីបអឺរ៉ុបមួយនេះសារជាថ្មី បន្ទាប់ពីខកខានឈ្នះពាននេះតាំងពីឆ្នាំ ២០១២ មក។ 

Havertz បានប្រាប់ទៅកាន់សារព័ត៌មាន BT Sport ក្រោយចប់ការប្រកួតថា៖ "ខ្ញុំមិនដឹងគួរនិយាយដូចម្តេចទេ... ខ្ញុំបានរង់ចាំពេលវេលានេះជាយូរមកហើយ! ខ្ញុំបានខិតខំជាង ១៥ឆ្នាំមកហើយដើម្បីសម្រេចសមិទ្ធិផលនេះ! ខ្ញុំពិតជារំភើបខ្លាំងណាស់"។

គួរបញ្ជាក់ថា នេះគឺជាការឈ្នះពាន Champions League លើកទី២ ក្នុងប្រវត្តិសាស្រ្តរបស់ក្លិប ក្រោយពីឈ្នះក្រុម Bayern Munich នៅវគ្គផ្តាច់ព្រ័ត្រតាំងពីឆ្នាំ ២០១២ ដោយជ័យជម្នះ ៤-៣ (បាល់ប៉េណាល់ទីកាត់សេចក្តី) នាទឹកដី Allianz Arena របស់ក្លិប Bayern Munich ផ្ទាល់៕