អាមេរិក៖ ប្រធានាធិបតីអាមេរិក លោក ចូ បៃឌិន បានបញ្ចេញមតិសុទិដ្ឋិនិយមដោយប្រាប់ឱ្យប្រជាជនអាមេរិកត្រៀមខ្លួនសម្រាប់ភារកិច្ចនៅចំពោះមុខក្នុងការរក្សា និងសង្គ្រោះប្រជាធិបតេយ្យពិភពលោក។

លោក បៃឌិន បានថ្លែងក្នុងវិមានសភាអាមេរិកនៅថ្ងៃទី៣ ខែមីនានេះថា៖ «ឥឡូវនេះគឺជាម៉ោងជាពេលនៃការទទួលខុសត្រូវរបស់យើង ការសាកល្បងនៃការតាំងចិត្ត និងសតិសម្បជញ្ញៈរបស់យើងក្នុងប្រវត្តិសាស្រ្តដោយផ្ទាល់។ នៅពេលនេះជាពេលដែលតួអង្គរបស់យើងត្រូវបានបង្កើតឡើង។ គោលបំណងរបស់យើងត្រូវបានរកឃើញ។ អនាគតរបស់យើងក៏ត្រូវបានបង្កើត ។ ខ្ញុំស្គាល់ប្រទេសជាតិនេះច្បាស់។ យើងនឹងជួបប្រទះការសាកល្បងដើម្បីការពារសេរីភាព និងឱកាសទទួលបានសេរីភាពដើម្បីពង្រីកភាពយុត្តិធម៌។ យើងនឹងជួយសង្គ្រោះលទ្ធិប្រជាធិបតេយ្យ។ ពេលដែលកំពុងមានភាពលំបាកបែបនេះ ខ្ញុំមានសុទិដ្ឋិនិយមខ្ពស់ចំពោះអាមេរិកនាពេលបច្ចុប្បន្ន ជាងពេលណាទាំងអស់ក្នុងមួយជីវិតខ្ញុំ»។

ថ្លែងដោយមានជំនឿជាក់នៅមុខសមាជិកសភា និងអ្នកនយោបាយអាមេរិក លោក ចូ បៃឌិន បានផ្ញើសារទៅរុស្ស៊ីថាលោកខាងលិចនឹងរួបរួមគ្នាក្នុងការឆ្លើយតបរបស់ខ្លួនចំពោះការលុកលុយរបស់រុស្ស៊ីលើអ៊ុយក្រែន និងថ្កោលទោសមេដឹកនាំរុស្ស៊ីចំពោះការឈ្លានពានរបស់គាត់។

លោក បៃឌិន បានលើកទឹកចិត្តដល់សមាជិកទាំងអស់ក្នុងអង្គជំនុំជម្រះឱ្យបង្ហាញការគាំទ្រលើរូបលោក ដោយនិយាយថា «សហរដ្ឋអាមេរិក និងសម្ព័ន្ធមិត្តមានការតាំងចិត្តដែលមិនផ្លាស់ប្តូរថាសេរីភាពនឹងតែងតែឈ្នះលើរបបផ្តាច់ការ»។

កាលពីថ្ងៃព្រហស្បតិ៍សប្ដាហ៍មុន ប្រទេសរុស្ស៊ីបានបើកការវាយប្រហារទ្រង់ទ្រាយធំលើប្រទេសអ៊ុយក្រែន។ ប្រធានាធិបតីរុស្ស៊ី លោក វ្ល៉ាឌីមៀ ពូទីន បានពន្យល់ពីការចាប់ផ្តើមប្រតិបត្តិការយោធាដោយភាពចាំបាច់ជាបន្ទាន់ដើម្បី «ធ្វើឱ្យអ៊ុយក្រែនគ្មានយោធា» ដើម្បីការពារសាធារណរដ្ឋ Donbass និងដើម្បីធានាថារុស្ស៊ីនឹងមិនត្រូវបានដាក់នៅក្រោមការគំរាមកំហែងដោយណាតូពីទឹកដីអ៊ុយក្រែន។ លោកខាងលិចដែលដឹកនាំដោយអាមេរិកបានឆ្លើយតបនឹងការវាយលុកដោយការដាក់ទណ្ឌកម្មថ្មីយ៉ាងតឹងរ៉ឹងលើរុស្ស៊ីចំពោះការវាយប្រហារនេះ និងបានត្រៀមអាវុធដើម្បីគាំទ្រដល់អ៊ុយក្រែនផងដែរ។

កាលពីថ្ងៃទី២៣ ខែកុម្ភៈ ឆ្នាំ២០២២ អ្នកនាំពាក្យក្រសួងការបរទេសចិនលោក Lijian Zhao បានបង្ហោះលើគណនី Twitter របស់លោក ដោយសរសេរថា «កុំភ្លេចថាអ្នកណាជាអ្នកគំរាមកំហែងពិតប្រាកដ» ដោយភ្ជាប់ជាមួយរូបភាពនៃការទម្លាក់ក្រោមបែករបស់អាមេរិក ជាមួយនឹងពាក្យថា តារាងទម្លាក់គ្រាប់បែករបស់អាមេរិក៖ ដំណើរទស្សនកិច្ចលោកប្រជាធិបតេយ្យ ដែលបង្ហាញពីការទម្លាក់គ្រាប់បែក និងការធ្វើសង្គ្រាមរបស់អាមេរិកលើប្រទេសដទៃពីឆ្នាំ១៩៥០ ដល់ឆ្នាំ២០១៥ ទៅលើប្រទេសជាង៣០នៅក្នុងពិភពលោក៕