ភ្នំពេញ៖ ឯកអគ្គរដ្ឋទូតចិនប្រចាំប្រទេសកម្ពុជា លោក វ៉ាង វិនធៀន បានថ្លែងការឆ្លងកាត់បទពិសោធន៍នៃជំងឹកូវីដ-១៩ បានបង្ហាញពីភាពរឹងមាំនិងការស្មោះត្រង់រវាងកម្ពុជានិងចិនកាន់តែច្បាស់ និងបានបញ្ជាក់ថាការកសាងជោគវាសនារួមរវាងចិននិងប្រទេសកម្ពុជានឹងផ្ដល់ប្រយោជន៍ដល់ប្រជាជនទាំងពីរកាន់តែច្រើនថែមទៀត។

លោក វ៉ាង វិនធៀន បានថ្លែងថា៖ «យើងមានហេតុផលគ្រប់គ្រាន់ដែលជឿថាកម្ពុជា ថ្ងៃស្អែកនឹងប្រសើរជាងនេះ។ ការកសាងជោគវាសនារួមចិននិងកម្ពុជានឹងនាំមកនូវផលប្រយោជន៍កាន់តែច្រើនជូនប្រជាពលរដ្ឋប្រទេសទាំងពីរ»។

លោកក៏បានបញ្ជាក់ថាប្រទេសចិននឹងគាំទ្រដល់ការដឹកនាំអាស៊ានរបស់កម្ពុជា ដោយជឿថាកម្ពុជានឹងចូលរួមចំណែកកសាងសន្ដិភាព និងស្ថិរភាពក្នុងតំបន់កាន់តែច្រើន។ ប្រទេសចិនក៏គាំទ្រដល់ការបោះឆ្នោតនៅកម្ពុជាផងដែរ។

លោកវ៉ាង វិនធៀន ថ្លែងបែបនេះក្នុងពេលចូលរួមជាមួយនាយករដ្ឋមន្ត្រីកម្ពុជាសម្ដេចតេជោ ហ៊ុន សែន សម្ពោធដាក់ឱ្យប្រើប្រាស់ផ្លូវជាតិលេខ៣ នាព្រឹកថ្ងៃទី៣ ខែមីនា ឆ្នាំ២០២២នេះ ក្នុងខេត្តតាកែវ៕