ភ្នំពេញ៖ នាយករដ្ឋមន្ត្រីកម្ពុជា សម្ដេចតេជោ ហ៊ុន សែន មានប្រសាសន៍ថា បើចង់ដករដ្ឋមន្ត្រីចេញម្នាក់គឺត្រូវការពេលតែ ២៤ ម៉ោងតែប៉ុណ្ណោះ។ សម្តេចថ្លែងបែបនេះ បន្ទាប់ពីបានស្តីបន្ទោសរដ្ឋមន្ត្រីកសិកម្មលោក វេង សាខុន ដែលថាជារដ្ឋមន្ត្រីមិនចេះសហការជាមួយរដ្ឋមន្ត្រីផ្សេងទៀត បន្ទាប់ពីមានសារឆ្លើយឆ្លងរវាងក្រសួងកសិកម្មនិងក្រសួងសេដ្ឋកិច្ចរឿងសាច់ជ្រូកកាលពីកន្លងទៅ។
សម្តេចមានប្រសាសន៍ថា សម្តេចមិនចង់ឱ្យមានការដករដ្ឋមន្ត្រីនៅពាក់កណ្តាលអាណត្តិឡើយ។
សម្ដេចតេជោមានប្រសាសន៍បែបនេះក្នុងពិធីបិទសន្និបាតត្រួតពិនិត្យលទ្ធផលការងារឆ្នាំ២០២១ និងលើកទិសដៅការងារឆ្នាំ២០២២ របស់ក្រសួងមហាផ្ទៃ នារសៀលថ្ងៃពុធ ទី២៣ ខែកុម្ភៈ ឆ្នាំ២០២២នេះ៕