ហុងកុង៖ ប្រជាជនហុងកុងជាច្រើនបានស្ទាក់ស្ទើរ ហើយតិចតួចមែនទែនដែលបានទទួលយកនូវវ៉ាក់សាំងកូវីដ-១៩ ខណៈរដ្ឋបាលទីក្រុងហុងកុងគ្រោងនឹងបោះចោលនូវវ៉ាក់សាំងប្រឆាំងកូវីដក្នុងចំនួនច្រើន ដោយក្នុងនោះក៏បានបញ្ជាក់ថា វ៉ាក់សាំងប្រភេទ Pfizer ចំនួន ២លានដូសអាចនឹងប្រើការលែងបាននៅអំឡុង ៣ខែខាងមុខនេះ។

មកដល់បច្ចុប្បន្ននេះ ហុងកុងមានប្រជាជនប្រមាណ ២០ភាគរយប៉ុណ្ណោះដែលស្ម័គ្រចិត្តទទួលយកវ៉ាក់សាំងការពារកូវីដ-១៩ បើទោះជាដែនដីហុងកុងទាំងមូល មាននូវចំនួនវ៉ាក់សាំងច្រើនដែលលើសលុបដែលអាចធានាផ្គត់ផ្គង់បានលើសពីចំនួនប្រជាជនសរុបជាង ៧,៥លាននាក់យ៉ាងណាក្តី។

ចំនួនដ៏តិចតួចនៃអ្នកទទួលវ៉ាក់សាំងនេះ ត្រូវបានគេដឹងថាមូលហេតុធំបំផុតនោះបណ្តាលមកពីចំនួនអ្នកឆ្លងមានតិចតួចក្នុងដែនដីហុងកុង បូកផ្សំពីការមិនយកចិត្តទុកដាក់ពីសំណាក់រដ្ឋាភិបាល។ មន្រ្តីដែលមកពីក្រុមការងារកិច្ចការវ៉ាក់សាំងរបស់រដ្ឋាភិបាលហុងកុងបានចេញមុខព្រមានថា "ប្រជាជនហុងកុង មានពេលត្រឹមតែ ៣ខែទៀតប៉ុណ្ណោះ មុននឹងរាប់លានដូសនៃវ៉ាក់សាំង Pfizer-BioNTech រាប់លានដូសត្រូវហួសកាលបរិច្ឆេទប្រើប្រាស់"។

រដ្ឋាភិបាលហុងកុង បានបញ្ជាទិញនូវវ៉ាក់សាំងប្រភេទ Pfizer BioNTech ចំនួន ៧លាន ៥សែនដូស និងវ៉ាក់សាំងចិន SinoVac ចំនួន ៧លាន ៥សែនដូសផ្សេងទៀត សម្រាប់ត្រៀមចាក់ជូនប្រជាជនរបស់ខ្លួន ប៉ុន្តែជាលទ្ធផលមានត្រឹមតែ​ ១៤ភាគរយប៉ុណ្ណោះ ឬស្មើនឹងប្រជាជនប្រហែល ១លាននាក់បានទទួលវ៉ាក់សាំងត្រឹមត្រូវគ្រប់ចំនួន ២ដូស។ អ្នកនយោបាយហុងកុងមួយចំនួនបានលើកឡើងថា រដ្ឋាភិបាលហុងកុងគប្បីនាំចេញវ៉ាក់សាំងនេះផ្តល់ឱ្យប្រទេសដែលមានតម្រូវការប្រើប្រាស់ជាជាងទុកចោលឱ្យផុតកំណត់ប្រើប្រាស់៕