បាត់ដំបង៖ អភិបាលខេត្តបាត់ដំបង លោក សុខ លូ ស្នើអាល្លឺម៉ង់តាមរយៈឯកអគ្គរដ្ឋទូតនៃសាធារណរដ្ឋសហព័ន្ធអាល្លឺម៉ង់ប្រចាំនៅប្រទេសកម្ពុជា ឲ្យមកធ្វើការវិនិយោគលើវិស័យផ្សេងៗនៅក្នុងខេត្តមួយនេះ ជាពិសេសរោងចក្រកែច្នៃផលិតផលកសិកម្ម។

ការស្នើនេះធ្វើឡើងនៅរសៀលថ្ងៃអង្គារ ទី១៥ ខែកុម្ភៈ ឆ្នាំ២០២២ ក្នុងឱកាសទទួលជួបសម្ដែងការគួរសមជាមួយ ឯកអគ្គរដ្ឋទូតនៃសាធារណរដ្ឋ សហព័ន្ធអាល្លឺម៉ង់ប្រចាំនៅប្រទេសកម្ពុជា លោក Christian Berger ដើម្បីពិភាក្សាការងារទាក់ទងនឹងកិច្ចសហប្រតិបត្តិការនិងកម្មវិធីគាំទ្រដែលត្រូវ បន្តអនុវត្តជាមួយនឹងរដ្ឋបាលខេត្តបាត់ដំបង។

លោក សុខ លូ បានលើកឡើងថា ទោះបីខេត្តបាត់ដំបងជាខេត្តកសិកម្មពិតមែន តែក៏នៅមានបញ្ហាផងដែរគឺមានការខ្វះខាតរោងចក្រ ឬសិប្បកម្មកែឆ្នៃផលិតផលកសិកម្ម ដែលនេះជាកង្វល់របស់ខេត្ត។ លោកបានស្នើដល់ឯកអគ្គរដ្ឋទូតនៃសាធារណរដ្ឋសហព័ន្ធអាល្លឺម៉ង់ប្រចាំនៅប្រទេសកម្ពុជា ជួយជំរុញផ្សព្វផ្សាយដល់អ្នកវិនិយោគទុន ឱ្យមកធ្វើការវិនិយោគទុនមកខេត្តបាត់ដំបង និងបន្តជួយលើគំរោងផ្សេងទៀតនៅក្នុងខេត្ត។

ក្នុងឆ្នាំ២០១៩កន្លងទៅនេះ ផ្ទៃដីអនុវត្តការដាំដុះស្រូវសរុបមានចំនួនជាង ៣៨ម៉ឺនហិកតា ទទួលបានទិន្នផលសរុបចំនួនជាង ១លានតោន ស្មើនឹងជាង៣តោនក្នុង១ហិកតា។

សក្តានុពលសេដ្ឋកិច្ចរបស់ខេត្តបាត់ដំបង គឺពឹងផ្អែកលើវិស័យកសិកម្មជាចម្បង ដោយសារមានកត្តាអំណោយផលពីធម្មជាតិ អាកាសធាតុ សណ្ឋានដីនិងដីដែលមានជីវជាតិខ្ពស់និងប្រព័ន្ធស្រោចស្រពសំបូរបែប។ ខេត្តបាត់ដំបងមានប្រភពទឹកនិងប្រព័ន្ធបង្ហូរទឹកជាច្រើនកន្លែង ដែលជាចំណុចខ្លាំងសម្រាប់វិស័យកសិកម្ម៕