ភ្នំពេញ៖ ហាង 14 Feb ហាងលក់ភេសជ្ជៈសុខភាព ដែលរួមកាហ្វេ តែ និងភេសជ្ជៈជំនួយសុខភាព ដែលមានតម្លៃប្រមាណ ៥០ម៉ឺនដុល្លាររបស់លោក សុខ ជំនោរ ត្រូវសម្ពោធដាក់ដំណើរការកាលពីម្សិលមិញ។

អ្នកនិពន្ធ និងអ្នកជាអ្នកជំនួញផងនោះ លោក សុខ ជំនោរ បានបញ្ជាក់ថា ការសម្រេចដាក់ឈ្មោះ 14 Feb ឬ ១៤ កុម្ភៈ ហើយបានទាំងបើកដំណើរការចំទិវានៃក្ដីស្រលាញ់ គឺដោយសារតែលោកយល់ថា ថ្ងៃនៃក្ដីស្រលាញ់គឺជាថ្ងៃដែលមនុស្សត្រូវមានក្ដីស្រលាញ់ ហើយដោយសារតែគ្រប់អាហារ និងភេជ្ជៈប្រចាំនៅក្នុងហាងលោក គឺសុទ្ធតែគិតគូពីសុខភាព ក្រៅពីផ្ដោតលើរសជាតិ ទើបលោកសម្រេចដាក់ឈ្មោះហាងថា 14 Feb ។

លោកថា យីហោភេជ្ជៈគ្រប់មុខប្រចាំហាងថ្មីនេះ គឺសុទ្ធតែជួយអោយមនុស្សមានសុខភាពល្អ និ ជួយកុំអោយមនុស្សមានបញ្ហាសុខភាព ទើបលោកយល់ថាដាក់ឈ្មោះ 14 Feb គឺត្រូវបំផុត។

លោកបានបញ្ជាក់ថា ហាងភេសជ្ជៈដែលបើកដំណើរការនេះ គឺជាការចាប់ដៃជាមួយអ្នកជំនាញ ដោយទោះជាលោកមិនមានឯកទេសផ្នែកកាហ្វេ និងភេសជ្ជៈ១០០ភាគរយ តែមុខរបរនេះក៏មានការគ្រប់គ្រងតាមផ្នែកច្បាស់លាស់មុននឹងឈានដំណើរការ។

ជាមួយអាជីវកម្មនេះ លោកក៏រំពឹងថា នឹងជោគជ័យខ្លាំងផងដែរ ដោយសារតែ ទី១សម្អាងលើទីតាំងល្អ ទី២សម្អាងលើទីតាំងធំទូលាយងាយទទួលភ្ញៀវ និងសំបូរកន្លែងថតគ្រប់ផ្នែក និងទី៣ សម្អាងលើគុណប្រយោជន៍នៃភេជ្ជៈ ដែលជំនួយដល់សុខភាព ក្រៅពីមានរសជាតិប្រកួតប្រជែង៕