អន្តរជាតិ៖ ប្រធានាធិបតីអាមេរិក លោក ចូ បៃឌិន និងប្រធានាធីបតីរុស្ស៊ី លោក វ្លាឌីមៀ ពូទីន បាននិយាយគ្នាតាមទូរស័ព្ទរយៈពេលមួយម៉ោងនៅថ្ងៃសៅរ៍ បន្ទាប់ពីទីក្រុងវ៉ាស៊ីនតោន និងសម្ព័ន្ធមិត្តរបស់ខ្លួនបានព្រមានថា កងកម្លាំងរុស្ស៊ីអាចឈ្លានពានអ៊ុយក្រែននៅពេលណាក៏បាន។

សេតវិមានបានបញ្ជាក់ថា លោកប្រធានាធិបតី ចូ បៃឌិន បានពិភាក្សាជាមួយលោកប្រធានាធិបតី ពូទីន ដើម្បីបញ្ជាក់ឱ្យច្បាស់ថា ប្រសិនបើរុស្ស៊ីឈ្លានពានអ៊ុយក្រែនបន្ថែមទៀត សហរដ្ឋអាមេរិកនិងសម្ព័ន្ធមិត្តនឹងដាក់វិធានការឆ្លើយតប និងធ្ងន់ធ្ងរលើរុស្ស៊ី។ លោកប្រធានាធិបតី ចូ បៃឌិន បានជំរុញឱ្យលោកប្រធានាធិបតី ពូទីន មានការបន្ធូរបន្ថយ និងយកវិធីសាស្ត្រការទូតជំនួសមកវិញ។

ក្រសួងការបរទេសសហរដ្ឋអាមេរិកបានបញ្ជាឱ្យបុគ្គលិកស្ថានទូតរបស់ខ្លួនភាគច្រើនចាកចេញពីប្រទេសអ៊ុយក្រែន។

ការបង្កើនវត្តមានយោធារបស់រុស្ស៊ីនៅជិតអ៊ុយក្រែន និងសកម្មភាពយោធាកើនឡើងបានជំរុញឲ្យមានការព្រួយបារម្ភថា រុស្ស៊ីអាចនឹងវាយយកអ៊ុយក្រែន ខណៈរុស្ស៊ីបដិសេធថាមិនមានផែនការបែបនេះទេ៕