ភ្នំពេញ៖ ព្រះមហាក្សត្រកម្ពុជា ព្រះករុណា ព្រះបាទសម្តេច ព្រះបរមនាថ នរោត្តម សីហមុនី បានយាងដល់រាជធានីភ្នំពេញវិញហើយនៅល្ងាចថ្ងៃសៅរ៍ ទី៥ ខែកុម្ភៈនេះ បន្ទាប់ពីចូលរួមពិធីបើកកីឡាអូឡាំពិករដូវរងានៅទីក្រុងប៉េកាំង កាលពីថ្ងៃទី៤ ខែកុម្ភៈ។
ព្រះទីនាំងយន្តហោះព្រះមហាក្សត្របានចុះចតនៅព្រលានយន្តហោះអន្តរជាតិភ្នំពេញនៅវេលាម៉ោងប្រមាណ៧និង៣០នាទីល្ងាចនេះ។
ព្រះអង្គចាកចេញពីកម្ពុជាទៅចូលរួមបើកព្រឹត្តិការណ៍អូឡាំពិកនៅទីក្រុងប៉េកាំងកាលពីថ្ងៃទី៣ ខែកុម្ភៈ ឆ្នាំ២០២២។ ព្រះអង្គបានចាត់ទុកព្រឹត្តិការណ៍កីឡាអូឡាំពិករដូវរងា និងប៉ារ៉ាឡាំពិកនៅទីក្រុងប៉េកាំងឆ្នាំ២០២២ ដែលប្រារព្ធឡើងក្រោមពាក្យស្លោក "រួមគ្នាដើម្បីអនាគតរួមគ្នា" តំណាងឱ្យអំណាចនៃការប្រកួតកីឡាដើម្បីជម្នះបញ្ហាប្រឈមជាសាកល ក្នុងនាមសហគមន៍មួយ ជាមួយនឹងអនាគតរួមគ្នាសម្រាប់មនុស្សជាតិ៕
