ភ្នំពេញ៖ រដ្ឋាភិបាលបានបញ្ជាដល់រដ្ឋបាលរាជធានី-ខេត្ដទាំងអស់រៀបចំចារឹកប្រវត្តិសាស្ត្រជាភាសាខ្មែរ ភាសាវៀតណាម និងភាសាអង់គ្លេស លើស្តូបមិត្តភាពកម្ពុជា-វៀតណាមដែលបានសាងសង់នៅ តាមរាជធានី-ខេត្តនីមួយៗ ដោយឆ្លាក់តួអក្សរឱ្យបានច្បាស់ ដើម្បីឱ្យសាធារណជន អាចមើលឃើញនិងអានបានយល់ដឹងនូវអត្ថន័យសច្ចភាពជាប្រវត្តិសាស្ត្រនៃការជួយគ្នារវាងប្រទេសទាំងពីរ។

ពាក្យដែលត្រូវចារនោះត្រូវសរសេរថា៖ «ស្តូបមិត្តភាពកម្ពុជា-វៀតណាម ត្រូវបានសាងសង់ឡើងដើម្បីជាសក្ខីភាពនៃការដឹងគុណនិងការចងចាំចំពោះពលិកម្មរបស់ប្រជាជនកម្ពុជា ដើម្បីបុព្វហេតុនៃការបង្រួបបង្រួមនិងឯកភាពទឹកដីវៀតណាមក្នុងអំឡុងទសវត្សរ៍៦០-៧០ និងជាសក្ខីភាពនៃការ ដឹងគុណនិងការចងចាំចំពោះពលិកម្មរបស់កងទ័ព និងប្រជាជន វៀតណាម ដើម្បីបុព្វហេតុរំដោះប្រជាជនកម្ពុជាចេញពីរបបប្រល័យពូជសាសន៍កម្ពុជាប្រជាធិបតេយ្យនៅទសវត្សរ៍៧០-៨០»។

រាជរដ្ឋាភិបាលបានបញ្ជាក់ថា គោលគំនិតដើមនៃការសាងសង់ស្តូបមិត្តភាព គឺជាការដឹងគុណរវាងគ្នានិងគ្នារវាងប្រទេសទាំងពីរ ទោះបីជាយ៉ាងនេះក្តី ក៏កន្លងមកមានមជ្ឈដ្ឋានមួយចំនួនមិនទាន់មានការយល់ដឹងច្បាស់លាស់អំពីអត្ថន័យពិតប្រាកដនៃស្តូបមិត្តភាពកម្ពុជា-វៀតណាម និងបានធ្វើការបកស្រាយក្នុងន័យ ផ្សេងៗគ្នា ខុសពីការពិត និងសច្ចភាពជាប្រវត្តិសាស្ត្រ។ ទន្ទឹមនេះ ក៏មានអ្នកនយោបាយខ្លះបានប្រើប្រាស់ស្តូបមិត្តភាពកម្ពុជា-វៀតណាម ជាមូលដ្ឋានដើម្បីធ្វើការវាយប្រហារ អុជអាល ញុះញង់ បំបែកបំបាក់ទំនាក់ទំនងមិត្តភាពកិច្ចសហប្រតិបត្តិការរវាងប្រទេសកម្ពុជានិងវៀតណាម និងបំផុសបំផុលឱ្យមានការរើសអើងប្រកាន់ពូជសាសន៍រវាងប្រជាជាតិនិងប្រជាជននៃប្រទេសទាំងពីរថែមទៀត។

ដូច្នេះការចារឹកទុកនូវប្រវត្តិសាស្ត្រនេះគឺជាការបង្កើននូវការយល់ដឹងនិងបញ្ឈប់នូវការចោទប្រកាន់ទាំងអស់នេះតទៅទៀត សំដៅបន្តពង្រឹងនិងលើកកម្ពស់ទំនាក់ទំនងកិច្ចសហប្រតិបត្តិការរវាងប្រទេសកម្ពុជា-វៀតណាម ដែលមានព្រំប្រទល់ជាប់គ្នា ដើម្បីធានាបាននូវផលប្រយោជន៍ទាំងសង្ខាង។

ការសម្រេចនៅពេលនេះគឺមានរយៈពេលប្រមាណជាង២សប្ដាហ៍បន្ទាប់ពី សម្ដេចតេជោ ហ៊ុន សែន បានបញ្ជាក់ពីប្រវត្តិសាស្រ្តនៃការជួយគ្នារវាងប្រទេសកម្ពុជានិងវៀតណាមកាលពីថ្ងៃទី១៦ ខែមករា ឆ្នាំ២០២២៕