អន្តរជាតិ៖ កីឡាករ Mason Greenwood របស់ក្លឹប Manchester United ត្រូវបានដោះលែងឲ្យនៅក្រៅឃុំ ដោយរង់ចាំការស៊ើបអង្កេតបន្ថែម បន្ទាប់ពីកីឡាករវ័យ ២០ឆ្នាំរូបនេះ ត្រូវបានចាប់ខ្លួនពីបទសង្ស័យរំលោភ និងធ្វើបាបលើនារីម្នាក់ដែលជាសង្សា។

នៅថ្ងៃអង្គារ ទី១ ខែកុម្ភៈ ឆ្នាំ២០២២ Greenwood ត្រូវបានចាប់ខ្លួនបន្ថែមទៀត ពីបទសង្ស័យរំលោភផ្លូវភេទ និងគំរាមកំហែងសម្លាប់។

ក្លឹបបាល់ទាត់ Manchester United បានចេញសេចក្តីថ្លែងការណ៍ថ្មីមួយបន្ទាប់ពីការវិវឌ្ឍន៍កាលពីថ្ងៃអង្គារដោយបានលើកឡើងថា «Man United សូមបញ្ជាក់ឡើងវិញនូវការថ្កោលទោសយ៉ាងខ្លាំងចំពោះអំពើហឹង្សាគ្រប់ប្រភេទ»។

កាលពីថ្ងៃអាទិត្យ ក្លឹបបីសាចក្រហមមួយនេះ បានផ្អាកកីឡាករ Mason Greenwood មិនឱ្យចូលទីលានហ្វឹកហាត់ និងសកម្មភាពផ្សេងៗទៀតរបស់ក្លឹប បន្ទាប់ពីការចោទប្រកាន់តាមអ៊ីនធឺណិតថាកីឡាករវ័យ ២0ឆ្នាំរូបនេះបានរំលោភបំពានលើនារីដែលជាសង្សារបស់ខ្លួន។

មកដល់ពេលនេះទាំង Greenwood និងអ្នកតំណាងមិនបានឆ្លើយតបនឹងការចោទប្រកាន់នោះទេ៕