ភ្នំពេញ៖ នាយករដ្ឋមន្ត្រីកម្ពុជា សម្តេចតេជោ ហ៊ុន សែន បានមានប្រសាសន៍ថា គ្មានពេលណាគណបក្សប្រជាជនកម្ពុជា និងប្រជាជនកម្ពុជា បំភ្លេចថ្ងៃ ៧ មករា នោះទេ ហើយថាបើទោះបីជាត្រូវធ្វើសង្រ្គាមដើម្បីការពារថ្ងៃនេះក៏ហ៊ានធ្វើដែរ។

សម្តេចតេជោ ហ៊ុន សែន បានថ្លែងបែបនេះនៅក្នុងពិធីបើកការដ្ឋានសាងសង់ស្ពានអាកាសតាមបណ្តោយផ្លូវជាតិលេខ៥ ត្រង់ចំនុចប្រសព្វស្ពានបេតុងអាមេខ្សែកាបប្ញស្សីកែវ ឆ្លងកាត់ទន្លេសាប និងផ្លូវជាតិលេខ៥ នៅថ្ងៃទី៣១ ខែមករា ឆ្នាំ២០២២។

សម្តេចតេជោបានបញ្ជាក់ថា៖ «គណបក្សប្រជាជនមានការចាំបាច់ដើម្បីបញ្ជូនសារទៅកាន់ជនរួមជាតិរបស់ខ្លួនថា សម័យកូវីដត្រូវតែមានការប្រុងប្រយ័ត្នសូម្បីតែបុណ្យមួយដែលចុះក្នុងប្រតិទិននៃការឈប់សម្រាក ក៏គណបក្សប្រជាជនមានការប្រយ័ត្នប្រយែងក្នុងធ្វើ កុំឲ្យគណបក្សប្រជាជនក្លាយទៅជា ចំណុចផ្ទុះនៃកូវីដ ១៩»។

សម្តេចបានឲ្យដឹងថា ដោយសារតែកន្លងទៅមានអ្នកវិភាគថា ហេតុអីបានជាគណបក្សប្រជាជន មិនព្រមធ្វើបុណ្យថ្ងៃ ៧ មករា ក្នុងឆ្នាំ ២០២១ ក៏អត់ធ្វើ និង ២០២២ ក៏អត់ធ្វើ បែរជាសម្តេចត្រូវចេញដំណើរទៅមីយ៉ាន់ម៉ា ដោយវិភាគថាគណបក្សប្រជាជនហាក់បីជាដកថយចេញពីឥទ្ធិពលរបស់វៀតណាម។

សម្តេចក៏បានបញ្ជាក់ថា៖ «រឿង៧ មករា ទោះបីជា វៀតណាមមកជួយ តែជាជីវិតរបស់ប្រជាជនកម្ពុជា សូមផ្តាំត្រលប់ទៅវិញឲ្យយល់ ឲ្យភ្លឺភ្នែក»។

^{PHOTO: EAC NEWS}