ក្រុងព្រះសីហនុ៖ សំណង់អត់ច្បាប់សាងសង់រំលោភលើចំណីឆ្នេរសមុទ្រស្ថិតនៅក្នុងភូមិ ៣ សង្កាត់លេខ ១ ក្រុងព្រះសីហនុតំបន់ទំនប់រលកត្រូវបានគណៈកម្មការចម្រុះរបស់អាជ្ញាធរខេត្តអាជ្ញាធរក្រុងបានចុះបញ្ឈប់ការសាងសង់លំនៅឋានលើចំណីឆ្នេរបន្តទៅទៀតនាព្រឹកថ្ងៃទី២៨ ខែមករាឆ្នាំ ២០២២។

នៅក្នុងការចុះត្រួតពិនិត្យលោកអភិបាលរងខេត្តព្រះសីហនុ លៀម សូដា បានឲ្យដឹងថាចំពោះសំណង់លំនៅឋានដែលសាងសង់រំលោភលើចំណីឆ្នេរខាងលើនេះក្រុមការងារបានចុះពិនិត្យឃើញជាក់ស្តែងគឺសំណង់បានចាក់គ្រឹះនិងចាក់សសរចំនួន ២៤ ដើមទំហំ ៦ ម៉ែត្រ គុណ ២៦ម៉ែត្រ ដែលម្ចាស់ផ្ទះបានរុះរើផ្ទះចាស់របស់គាត់ដែលមានទំហំ ៦ ម៉ែត្រ គុណ ១៥ម៉ែត្រហើយបានបន្តសាងសង់បន្ថែម ១១ម៉ែត្រគុណ៦ម៉ែត្រចូលទៅក្នុងចំណីសមុទ្រ ដូចនេះក្រុមការងារបានបញ្ឈប់ការសាងសង់បន្តទៀតនិងតម្រូវឲ្យម្ចាស់សំណង់រុះរើដោយខ្លួនឯងដោយទុករយៈពេល ១៥ថ្ងៃក្នុងករណីម្ចាស់សំណង់មិនគោរពតាមការណែនាំក្រុមការងារនិងអនុវត្តទៅតាមនីតិវិធីច្បាប់។

ជាមួយគ្នានេះដែរលោកប្រធានក្រុមការងារបានណែនាំដល់បងប្អូនប្រជាពលរដ្ឋទាំងអស់កុំទន្ទ្រានការសាងសង់លើចំណីឆ្នេរដែលជាសម្បត្តិសាធារណៈរបស់រដ្ឋបន្តទៅទៀតគឺជាអំពើល្មើសច្បាប់៕