ព្រះសីហនុ៖ នាយករដ្ឋមន្រ្តីកម្ពុជា សម្តេចតេជោ ហ៊ុន សែន នៅថ្ងៃទី១៨ ខែមករា ឆ្នាំ២០២២ បានជំរុញអាស៊ានសិក្សានិងរៀបចំនូវប្រព័ន្ធរួមមួយសម្រាប់ការបញ្ជាក់ទទួលស្គាល់ពីការចាក់វ៉ាក់សាំងបង្ការជំងឺកូវីដ-១៩គ្រប់ដូស និងគាំទ្រកម្មវិធីទេសចរណ៍វ៉ាក់សាំង នៅក្នុងតំបន់អាស៊ាន។

ក្នុងឱកាសអញ្ជើញបើកវេទិកាទេសចរណ៍អាស៊ានលើកទី៤០ នៅខេត្តព្រះសីហនុ សម្តេចតេជោ ហ៊ុន សែន បានថ្លែងថា ក្នុងរយៈពេលខ្លីអាស៊ានត្រូវគិតគូរជំរុញចលនាទេសចរណ៍ផ្ទៃក្នុងបន្ថែមទៀត ស្របតាមទស្សនៈអាស៊ានដើម្បីអាស៊ាន ហើយសម្តេចបានគាំទ្រទាំងស្រុងនូវគំនិតផ្តួចផ្តើមបើកទេសចរណ៍ផ្ទៃក្នុងអាស៊ានក៏ដូចជាបើកតំបន់ទាំងមូល ដើម្បីទទួលស្វាគមន៍ភ្ញៀវទេសចរអន្តរជាតិឡើងវិញ។

សម្ដេចតេជោ ហ៊ុន សែន បានមានប្រសាសន៍ថា៖ «រដ្ឋមន្ត្រីទេសចរណ៍អាស៊ាន និងស្ថាប័នសុខាភិបាលអាស៊ាន ត្រូវធ្វើការសិក្សា និងរៀបចំនូវប្រព័ន្ធរួមមួយសម្រាប់ការបញ្ជាក់ទទួលស្គាល់ពីការចាក់វ៉ាក់សាំងបង្ការជំងឺកូវីដ-១៩គ្រប់ដូស នៅក្នុងតំបន់អាស៊ាន និងស្នើឱ្យអាស៊ានគិតគូរពិចារណា ក្នុងការសម្រួលលក្ខខណ្ឌនៃការធ្វើដំណើរទេសចរណ៍ជាបណ្តើរៗឡើងវិញ ដោយឈរលើគោលការណ៍នៃការប្រុងប្រយ័ត្នខ្ពស់»។

គួរបញ្ជាក់ផងដែរថា កម្ពុជាបានបើកអនុញ្ញាតឲ្យទេសចរអន្តរជាតិដែលបានចាក់វ៉ាក់សាំងគ្រប់ចំនួនតាំងពីខែតុលា ឆ្នាំ២០២១មកម្ល៉េះ។ បច្ចុប្បន្ននេះអ្នកដែលបានចាក់វ៉ាក់សាំងរួចមកពីក្រៅប្រទេសតម្រូវឲ្យមានលិខិតបញ្ជាក់ថា តេស្តអវិជ្ជមានត្រឹមត្រូវរួច តេស្តម្តងទៀតលើទឹកដីកម្ពុជាពេលចេញលទ្ធផលអវិជ្ជមានគឺអនុញ្ញាតឱ្យធ្វើដំណើរដោយសេរីក្នុងប្រទេសកម្ពុជាតែម្តង៕