អន្តរជាតិ៖ ព្រះរាជបុត្រទី២ របស់ម្ចាស់ក្សត្រី Elizabeth គឺព្រះអង្គម្ចាស់ Andrew កាលពីថ្ងៃព្រហស្បតិ៍ ត្រូវបានដកចេញពីមុខតំណែងជាខ្សែររាជវង្សបន្ទាប់ពីព្រះអង្គប្រឈមមុខនឹងសំណុំរឿងរដ្ឋប្បវេណីរបស់សហរដ្ឋអាមេរិក ពីបទរំលោភបំពានផ្លូវភេទ។

ប្រព័ន្ធផ្សព្វផ្សាយអង់គ្លេសបានដកស្រង់ប្រភពរាជវង្សដែលមិនបញ្ចេញឈ្មោះដោយនិយាយថា ទ្រង់នឹងលែងមានងារជារាជវង្សទៀតហើយ ខណៈព្រះរាជវាំងអង់គ្លេស Buckingham ក៏បានប្រកាសថាគាត់ក៏បានបោះបង់ចោលតំណែងយោធាកិត្តិយសផងដែរ។ ព្រះអង្គម្ចាស់នឹងបន្តមិនបំពេញភារកិច្ចសាធារណៈនានាដដែល ហើយនឹងឡើងការពារក្តីនៅសហរដ្ឋអាមេរិក ក្នុងនាមជាប្រជាជនទូទៅ។

ព្រះអង្គម្ចាស់ Andrew មានរឿងក្តីមួយនៅអាមេរិក ពាក់ព័ន្ធការរំលោភបំពានផ្លូវភេទ ដែលត្រូវបានស្ត្រីជនជាតិអាមេរិកឈ្មោះ Virginia Guiffre ចោទប្រកាន់ថា ធ្លាប់បំពានផ្លូវភេទទៅលើអ្នកស្រីកាលពីអ្នកស្រីនៅមានអាយុ១៧ឆ្នាំ ក្នុងឆ្នាំ ២០០១។ អ្នកស្រី Guiffre បានអះអាងថា អតីតមហាសេដ្ឋីអាមេរិក លោក Jeffrey Epstein ជាអ្នកនាំគាត់ទៅជួបព្រះអង្គម្ចាស់ Andrew៕