ភ្នំពេញ៖ នាយករដ្ឋមន្ត្រីកម្ពុជាសម្ដេចតេជោ ហ៊ុន សែន បានប្រកាសមិនអនុញ្ញាតឱ្យមានការព្យាលជំងឺកូវីដ-១៩ បម្លែងថ្មីអូមីក្រុងនៅផ្ទះនោះទេ ដោយតម្រូវឱ្យយកទៅព្យាបាលនៅមន្ទីរពេទ្យដើម្បីការពារការចម្លងនៃជំងឺនេះទៅក្នុងសហគមន៍។

ក្នុងឱកាសអញ្ជើញប្រគល់ប្រាក់រង្វាន់របស់រាជរដ្ឋាភិបាល ជូនកីឡាការិនី អ៊ុក ស្រីមុំ ក្រោយដណ្តើមបានមេដាយមាសពិភពលោកពីការប្រកួតកីឡាប៉េតង់ ដែលធ្វើឡើងនៅឯវិមានសន្តិភាព នៅព្រឹកថ្ងៃទី៥ ខែមករានេះ សម្តេចតេជោ មានប្រសាសន៍ថា អ្នកជំងឺដែលបានឆ្លងអូមីក្រុងត្រូវតែទៅព្យាបាលនៅមន្ទីពេទ្យដោយសារតែកម្រិតនៃការចម្លងមេរោគនេះហាក់មានសភាពលឿនបើធៀបទៅនឹង មេរោគ ដែលតា និងមេរោគផ្សេងទៀត។ សម្តេចក៏បានបញ្ជាក់ថា បើទោះបីជាអ្នកជំងឺនោះមានផ្ទះដែលមានទីធ្លាធំទូទាយដែលអាចព្យាបាលដោយខ្លួនឯងក៏ដោយ ក៏មិនអនុញ្ញាតឲ្យនៅផ្ទះបានដែរ។

សម្តេចតេជោថា៖ «សូម្បីតែខ្លួនខ្ញុំបើសិនជាទៅប្រទេសម៊ីយ៉ាន់ម៉ាហើយត្រលប់មកវិញតេស្តឃើញអូមីក្រុង ខ្ញុំក៏ត្រូវព្យាបាលនៅមន្ទីពេទ្យដែរ ដើម្បីធ្វើជាគំរូគេ»។

ទោះបីយ៉ាងណាក៏ដោយសម្តេចក៏បានលើកឡើងពី ការលើកលែងចំពោះកូនអគ្គរដ្ឋទូតអាមេរិកម្នាក់ដែលបានស្នើសុំផងដែរ ដោយសារតែមានការធានាពីអគ្គរដ្ឋទូត។

សម្ដេចតេជោ បញ្ជាក់ថាបច្ចុប្បន្នរាជរដ្ឋាភិបាលសម្រេចយកមន្ទីរពេទ្យហ្លួងម៉ែដែលមានទីតាំងនៅសង្កាត់ព្រៃស ខណ្ឌដង្កោ រាជធានីភ្នំពេញ ដើម្បីព្យាបាលអ្នកជំងឺកូវីដ-១៩ បម្លែងថ្មីអូមីក្រុង។

បើតាមសម្ដេចតេជោ ហ៊ុន សែន មកដល់ពេលនេះកម្ពុជារកឃើញករណីឆ្លងអូមីក្រុងនាំចូល ចំនួន ៩៤ករណីហើយដែលជាករណីនាំចូល ដោយមកដល់ពេលនេះមិនទាន់មានករណីក្នុងសហគមន៍នៅឡើយទេ៕