កោះកុង៖ នាយករដ្ឋមន្ត្រីកម្ពុជា សម្ដេចតេជោ ហ៊ុន សែន បានបញ្ជាទៅប្រធានគណៈកម្មការចំពោះកិច្ចចាក់វ៉ាក់សាំងកូវីដ-១៩ ក្នុងក្របខណ្ឌទូទាំងប្រទេសលោកស្រី ឱ វណ្ណឌីន ឱ្យពិនិត្យឡើងវិញពីលទ្ធភាពចាក់វ៉ាក់សាំងជូនពលរដ្ឋចំនួន ៧ម៉ឺននាក់ដែលត្រូវបានក្រុមគ្រូពេទ្យបដិសេធកាលពីកន្លងមកដោយសារបញ្ហាសុខភាព។

ថ្លែងក្នុងពិធីបើកការដ្ឋានគម្រោងសាងសង់លើកកម្រិតគុណភាពផ្លូវជាតិលេខ៤៨ ក្នុងខេត្តកោះកុង នាព្រឹកថ្ងៃទី៣ ខែមករា ឆ្នាំ២០២២នេះ សម្ដេចតេជោ ហ៊ុន សែន បានថ្លែងថាសម្ដេចមានការសប្បាយចិត្តដែលបានឃើញពលរដ្ឋចូលរួមប្រារព្ធបុណ្យឆ្លងឆ្នាំសកលដោយរីករាយ ហើយស្ថានភាពនៃជំងឺកូវីដ-១៩ មិនមានការផ្ទុះឡើងក្នុងសហគមន៍នោះទេ។ ទោះជាយ៉ាងណាសម្ដេច ជំរុញដល់ពលរដ្ឋបន្តរក្សានូវវិធានការសុវត្ថិភាព និងចាក់វ៉ាក់សាំងកូវីដ-១៩ ឱ្យបានគ្រប់គ្នា ក្នុងន័យនេះសម្ដេចតេជោ ហ៊ុន សែន បានបញ្ជាដល់ក្រសួងសុខាភិបាលពិនិត្យចាក់វ៉ាក់សាំងឡើងវិញដល់ពលរដ្ឋជាង ៧ម៉ឺននាក់ដែលត្រូវបានគ្រូពេទ្យបដិសេធមិនចាក់វ៉ាក់សាំងឱ្យកាលពីកន្លងទៅផងដែរ។

សម្ដេចមានប្រសាសន៍ថា៖ «កាលពីមុននៅក្រសួងការពារជាតិសម្ដេចពិជ័យសេនា ទៀ បាញ់ បញ្ជាឱ្យចាក់ហ្មងអ្នកណាក៏ចាក់មិនបានអ្នកណាក៏ចាក់មិនបានគ្រូពេទ្យមិនឱ្យចាក់។ ស្រាប់តែមានអីបើកឱ្យចាក់ទាំងអស់ហើយមានទៅកើតអីមួយផង! ឥឡូវសូមពិនិត្យឡើងវិញជាង ៧ម៉ឺននាក់គាត់ទៅក៏ប៉ុន្ដែគ្រូពេទ្យយើងបែរជាមិនឱ្យគាត់ចាក់សូមពិនិត្យឡើងវិញ។ […] ជំងឺខ្លះអាចចាក់បាន គេហាមថាមិនឱ្យចាក់ តែលើមនុស្សកើតហឺត តែគាត់កើតតែពីតូច គេហាមតែពេលកើតហឺត គេមិនឱ្យចាក់ តែហឺតខ្លះកើតតែពីតូច ដល់ឥឡូវគាត់អាយុ ៤០ប្លាយហើយនៅមិនឱ្យចាក់ ដោយថាមានប្រវត្តិកើតហឺត។ ទេគេហាមតែថាមិនឱ្យចាក់ពេលដែលកំពុងកើតហឺតបានគេមិនឱ្យចាក់»។

យោងតាមរយបាយការណ៍ចាក់វ៉ាក់សាំងទូទាំងប្រទេសរហូតមកដល់ពេលនេះមានពលរដ្ឋស្ម័គ្រចិត្តមកចាក់វ៉ាក់សាំងបានជាង ១៤លាន៣សែននាក់ ក្នុងនោះអ្នកដែលពេទ្យទទួលចាក់ជូនមានចំនួនជាង១៤លាន ២សែននាក់ ខណៈអ្នកដែលមិនត្រូវបានពេទ្យអនុញ្ញាតចាក់ជូនមានជាង៧ម៉ឺន ៣ពាន់នាក់៕