ភ្នំពេញ៖ រដ្ឋមន្ត្រីការពារជាតិ សម្ដេចពិជ័យសេនា ទៀ បាញ់ បានឱ្យដឹងថាក្រុមការងារជំនាញប្រវត្តិសាស្ត្រយោធាក្រសួងបានរកឃើញទីតាំងប្រវត្តិសាស្ត្រយោធាចំនួន៥៥ទីតាំងនៅតាមតំបន់ព្រំដែនដើម្បីរៀបចំកសាងតំបន់ប្រវត្តិសាស្ត្រយោធា នេះឡើងវិញ។

ក្នុងពិធីសម្ពោធដាក់ឱ្យប្រើប្រាស់អគាររដ្ឋបាលថ្មីក្រសួងការពារជាតិនាព្រឹកថ្ងៃទី២៩ ខែធ្នូ នេះសម្ដេចពិជ័យសេនា ទៀ បាញ់ បានថ្លែងថា តំបន់ប្រវត្តិសាស្ត្រយោធាទាំងនោះមានទីតាំងនៅក្នុងតំបន់អន្លង់វែង អូរស្មាច់ កោះកុង និងបានសម្រេចកសាងវិមានឈ្នះ-ឈ្នះ ក្នុងតំបន់ដែលមានអទិភាពមួយចំនួន ក៏ដូចជាកសាងស្ដូបឈ្នះ-ឈ្នះនៅខេត្តកោះកុងផងដែរ។

សម្ដេចពិជ័យសេនា បានបន្តថាបច្ចុប្បន្នក្រសួងកំពុងរៀបចំតំបន់ X16 ដែលមានទីតាំងនៅកោះថ្ម ខេត្តត្បូងឃ្មុំ ដើម្បីអបអរខួបអនុស្សាវរីយ៤៥ឆ្នាំ(២០ មិថុនា ១៩៧៧-២០ មិថុនា ២០២២) នៃការចងចាំដំណើរឆ្ពោះទៅរកការផ្ដួលរំលំរបបប្រល័យពូជសាសន៍ ប៉ុល ពតផងដែរ។

បន្ទាយកោះថ្ម នៅឃុំទន្លូង ស្រុកមេមត់ ខេត្តកំពង់ចាម(បច្ចុប្បន្នខេត្តត្បូងឃ្មុំ) គឺជាទីកន្លែងនៃការកកើតខ្មែរក្រហម ក៏ដូចជាកន្លែងដែលសម្ដេចតេជោចាប់ផ្ដើមដំបូងបង្អស់នៃដំណើរឆ្ពោះទៅរកការផ្ដួលរំលំរបបប្រល័យពូជសាសន៍ ប៉ុល ពតផងដែរ៕