ភ្នំពេញ៖ មនុស្សចំនួន១២នាក់ ក្នុងនោះស្រី៣នាក់ដែលសង្ស័យមានជាប់ពាក់ព័ន្ធនឹងអំពើប្លន់ឧកញ៉ា អ៊ាន សៀវម៉ី កាលពីថ្ងសទី១៩ ខែធ្នូ ត្រូវបានកម្លាំងអាវុធហត្ថរាជធានីភ្នំពេញចុះបង្ក្រាបនិងឃាត់ខ្លួនបាននាយប់ថ្ងៃទី២០ ខែធ្នូ នេះ នៅក្នុងបុរីប៉េងហួតផ្លូវ៦០ម៉ែត្រ សង្កាត់ចាក់អង្រែក្រោម ខណ្ឌមានជ័យ រាជធានីភ្នំពេញ។

អាវុធហត្ថរាជធានីភ្នំពេញឱ្យដឹងថាក្នុងការចុះបង្ក្រាបនិងឃាត់ខ្លួននេះកម្លាំងប្រមូលបានគ្រឿងពេជ្រត្រលប់មកវិញនិងដកហូតអាវុធវែងខ្លីចំនួន៥ដើមផងដែរ។

ជាមួយគ្នានេះកម្លាំងនគរបាលបានរាជធានីភ្នំពេញក៏បានស្រាវជ្រាវ និងដេញឃាត់ឡានដែលសង្ស័យធ្វើសកម្មភាពប្លន់កាលពីម្សិលមិញផងដែរ តែអ្នកបើកបានរត់គេខ្លួនបាត់ពេលពេលដល់កម្ពោធព្រៃមួយ ហើយកម្លាំងនគរបាលកំពុងឡោមព័ទ្ធតំបន់នោះដើម្បីរុករកជនសង្ស័យផងដែរ។

ស្នងការដ្ឋាននគរបាលរាជធានីភ្នំពេញបានចុះផ្សាយលើហ្វេសបុកផ្លូវការរបស់ខ្លួនថា៖ «ជនសង្ស័យបានបើកទ្វារលោតគេចខ្លួនចូលក្នុងគម្ពោធព្រៃ ពេលនេះសមត្ថកិច្ចកំពុងធ្វើការឡោមព័ទ្ធទីតាំងនោះ ដើម្បីបន្តរុករកជនសង្ស័យ ដែលរត់គេចខ្លួន។ ដោយពិនិត្យឃើញមានដបសាំងក្នុងរថយន្ត សមត្ថកិច្ចបានធ្វើការសន្និដ្ឋានជាបឋមថាជនសង្ស័យមានបំណងបើករថយន្តទៅកន្លែងស្ងាត់ដើម្បីដុតកំទេចចោលបំផ្លាញភស្តុតាង» ។

គួររំលឹកផងដែរថា កាលពីម៉ោងប្រមាណ១០ និង៣០នាទីព្រឹកថ្ងៃទី១៩ ខែធ្នូ ម្សិលមិញ ឧកញ៉ា អាន សៀវម៉ី ត្រូវបានចោរបួននាក់បន្លំខ្លួនជាសមត្ថកិច្ចចុះអនុវត្តដីកាចាប់វ៉ៃខ្នោះ ប្លន់យកទ្រព្យសម្បត្តិមួយចំនួន។

របាយការណ៍ចុងក្រោយពីសមត្ថកិច្ចឱ្យដឹងថា ជនរងគ្រោះបានបាត់បង់សម្ភាររួមមានខ្សែកពេជ្រធំ ចំនួន៣ខ្សែ និងគ្រឿងអលង្កា (ពេជ្រ) មួយចំនួនទៀត យោងទៅលើវិក័យបត្រ ទិញ-លក់ គិតជាទឹកប្រាក់សរុបប្រហែលជា ១,៦ ទៅ១,៩ លានដុល្លាអាមេរិច និងទូរស័ព្ទដៃម៉ាក Iphone ចំនួន ២គ្រឿងផងដែរ៕