បាត់ដំបង៖ សេចក្តីរាយការណ៍ពីប្រជាពលរដ្ឋបានអោយដឹងថា អាជីវកម្មដឹកជញ្ជូនអាចម៌ដីលក់របស់ក្រុមហ៊ុន លាភ រីណា នៅចំណុចភូមិអូរមុនី ឃុំអន្លង់វិល ស្រុកសង្កែ ខេត្តបាត់ដំបង កំពុងជីកកកាយដីដែលមានជម្រៅជ្រៅ ព្រមទាំងបើកបរដឹកដីមិនគ្របបង្កការភ័យខ្លាចនិងធ្វើអោយប៉ះពាល់ទៅដល់សណ្តាប់ធ្នាប់ សាធារណៈ។

ប្រភពពីប្រជាពលរដ្ឋដែលជាកសិករធ្វើស្រែក្បែររណ្តៅដី នៅចំណុចភូមិអូរមុនី ឃុំអន្លង់វិល ស្រុកសង្កែ និងប្រជាពលរដ្ឋជាអ្នកធ្វើដំណើរតាមដងផ្លូវ បានប្រាប់អ្នកយកព័ត៌មានថា ជារៀងរាល់ថ្ងៃពួកគាត់តែងមានការព្រួយបារម្មណ៍យ៉ាងខ្លាំងទៅលើសុវត្ថិភាពកូនចៅរបស់ពួកគាត់ខណៈដែលអាជីវកម្មដឹកដីលក់របស់ក្រុមហ៊ុនដែលមានឈ្មោះថា លាភ រីណា បាននឹងកំពុងជីកកកាយរណ្តៅយកអាចម៌ដីដែលមានជម្រៅជ្រៅ ព្រមទាំងការបើកបរដឹកដីមិនគ្របជាហេតុអាចធ្វើអោយមានដីជ្រុះនៅតាមដងផ្លូវប៉ះពាល់ទៅដល់សណ្តាប់ធ្នាប់សាធារណៈ និងអាចបង្កអោយកើតមានករណីគ្រោះថ្នាក់ចរាចរណ៍ផងដែរ។

ប្រភពពីប្រជាពលរដ្ឋដដែលបានអោយដឹងថា រយៈពេលកន្លងមកពួកគាត់តែងតែបានឃើញមានករណីក្មេងលង់ទឹកក្នុងរណ្តៅដីដែលក្រុមឈ្មួញធ្វើអាជីវកម្មនេះជាបន្តបន្ទាប់នៅតាមបណ្តាស្រុកមួយចំនួនក្នុងនោះក៏មានស្រុកសង្កែនេះផងដែរ ដែលថ្មីៗនេះស្លាប់រហូតទៅដល់ ២នាក់ដែលជាហេតុធ្វើអោយពួកគាត់មានការព្រួយបារម្ភ ខណៈដែលក្រុមឈ្មួញនៅតែបន្តជីកកាយរណ្តៅជ្រៅរហូតជាង ១០ម៉ែត្រល្មើសផ្ទុយទៅនឹងច្បាប់ដែលបានអនុញ្ញាតកំណត់អោយជីកត្រឹមតែ ៥ម៉ែត្រ ឬលើសបន្តិចបន្តួច។

ពាក់ព័ន្ធទៅនឹងការលើកឡើងខាងលើ លោក អ៊ាន មាឃ ប្រធានមន្ទីររ៉ែនិងថាមពលខេត្តបាត់ដំបង បានប្រាប់អោយដឹងថាក្រុមហ៊ុន លាភ រីណា ទទួលបានការអនុញ្ញាតឱ្យជីកដីជម្រៅត្រឹម ៥ម៉ែត្រប៉ុណ្ណោះ ខណៈលោកថាលោកបានឱ្យមន្ត្រីចុះណែនាំ ពិនិត្យនិងផាកពិន័យរួចហើយដែរ។ លោកក៏ព្រមានថាការពិន័យនឹងគុណជាពីរប្រសិនជាក្រុមហ៊ុនខាងលើនៅតែមិនព្រមស្ដាប់តាមការណែនាំ៕