ភ្នំពេញ៖ ឯកអគ្គរដ្ឋទូតបារាំងលោក ហ្សាក់ ប៉ឺឡេ បានបញ្ជាក់ប្រាប់រដ្ឋមន្ត្រីក្រសួងហិរញ្ញវត្ថុកម្ពុជាថារដ្ឋាភិបាលបារាំងនឹងបង្កើនទំហំឥណទានសម្បទាន និងខិតខំជួយគៀរគហិរញ្ញប្បទានឥតសំណងពីសហគមអឺរ៉ុប និងពីប្រភពផ្សេងទៀតសម្រាប់រួមចំណែកអភិវឌ្ឍ និងស្តារសេដ្ឋកិច្ចកម្ពុជា បន្ទាប់ពីវិបត្តិកូវីដ-១៩ ស្របតាមគោលនយោបាយ និងយុទ្ធសាស្ត្រអភិវឌ្ឍន៍ជាតិរបស់កម្ពុជា។

ថ្លែងក្នុងជំនួបជាមួយរដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុលោកឧបនាយករដ្ឋមន្ត្រី អូន ព័ន្ធមុនីរ័ត្ន នៅរសៀលថ្ងៃទី១៥ ខែធ្នូ ម្សិលមិញលោក ហ្សាក់ ប៉ឺឡេ បានថ្លែងថា កម្ពុជានិងបារាំងមានទំនាក់ទំនងយូរអង្វែងមកហើយពិសេសកិច្ចសហការប្រតិបត្តិការអភិវឌ្ឍន៍ក្រោមគម្រោងAFD។ លោកបន្ថែមថាកិច្ចសហការនេះបានចូលរួមជួយដល់មហិច្ចតាអភិវឌ្ឍន៍របស់ប្រធានាធិបតីបារាំង Emmanuel Macron ដើម្បីចូលរួមអភិវឌ្ឍន៍ខឿនសេដ្ឋកិច្ចរបស់ប្រទេសកំពុងអភិវឌ្ឍន៍ដែលមានដូចជាកម្ពុជាផងដែរ។

លោកសន្យាថានាថ្ងៃខាងមុខរដ្ឋាភិបាលបារាំងនឹងបង្កើនទំហំឥណទានបន្ថែមទៀតដល់កម្ពុជាដើម្បីរួមចំណែកអភិវឌ្ឍ និងស្ដារសេដ្ឋកិច្ចកម្ពុជាបន្ទាប់ពីវិបត្តិកូវីដ-១៩ ស្របតាមគោលនយោបាយជាតិកម្ពុជាដែលកំពុងអនុវត្តន៍។

ឧបនាយករដ្ឋមន្ត្រីក្រសួងសេដ្ឋកិច្ចលោក អូន ព័ន្ធមុនីរ័ត្ន ថ្លែងថាសាធារណរដ្ឋបារាំងបានចូលរួមចំណែកក្នុងការអភិវឌ្ឍន៍ដល់សេដ្ឋកិច្ច-សង្គមកម្ពុជា ស្ទើរគ្រប់វិស័យ ជាពិសេស ក្នុងវិស័យសុខាភិបាល ទឹកស្អាត អគ្គិសនី កសិកម្ម អប់រំ និងគម្រោងវិនិយោគសាធារណៈជាច្រើនចាប់តាំងពីមានកិច្ចព្រមព្រៀងសន្ដិភាពក្រុងប៉ារីសមក។

លោកបានអរគុណចំពោះរដ្ឋាភិបាលបារាំងនិងប្រជាជនបារាំងដែលបានបន្តគាំទ្រ ទាំងជំនាញបច្ចេកទេស និងទាំងហិរញ្ញវត្ថុ ក៏ដូចជាបានផ្តល់នូវកិច្ចសហប្រតិបត្តិការល្អជាមួយកម្ពុជានាពេលកន្លងទៅ ហើយបានស្នើឲ្យបារាំងបន្តជួយសម្របសម្រួលទាក់ទាញអ្នកវិនិយោគគិនបារាំង និងអឺរ៉ុប មកវិនិយោគនៅកម្ពុជាឲ្យបានច្រើនបន្ថែមទៀត។

នៅក្នុងឆ្នាំ២០២១នេះ បារាំង-កម្ពុជា បានចុះហត្ថលេខាលើកិច្ចព្រមព្រៀងហិរញ្ញប្បទានសហប្រតិបត្តិការចំនួនពីរ មានទឹកប្រាក់សរុបប្រមាណ ២០,៣០ លានអឺរ៉ូ ដើម្បីគាំទ្រដល់ការអភិវឌ្ឍវិស័យ កសិកម្ម ទឹក និងការប្រយុទ្ធប្រឆាំងនឹងបម្រែបម្រួលអាកាសធាតុ៕