ភ្នំពេញ៖ រដ្ឋមន្ត្រីការបរទេសចិនលោក វ៉ាង យី បានបញ្ជាក់ប្រាប់រដ្ឋមន្ត្រីការបរទេសកម្ពុជាលោក ប្រាក់ សុខុន ថាប្រទេសចិនកំពុងពិចារណាក្នុងការបើកជើងហោះហើរទាំងអស់រវាងកម្ពុជា-ចិនឡើងវិញ ថែមទាំងជំរុញអ្នកទេសចរ និងអ្នកវិនិយោគចិនឱ្យមកវិនិយោគនៅកម្ពុជាផងដែរ។

ក្នុងជំនួបពិភាក្សាទ្វេភាគីរវាងរដ្ឋមន្ត្រីការបរទេសកម្ពុជា និងរដ្ឋមន្ត្រីការបរទេសចិន នៅទីក្រុងហាងចូវ ខេត្តជឺជាំង សាធារណរដ្ឋប្រជាមានិតចិននៅថ្ងៃនេះ រដ្ឋមន្ត្រីនៃប្រទេសទាំងពីរបានវាយតម្លៃខ្ពស់នៃទំនាក់ទំនងកាលពីកន្លងទៅនិងគោលដៅនាពេលអនាគតនៃប្រទេសទាំងពីរទាងកិច្ចសហប្រតិបត្តិការ សង្គម សេដ្ឋកិច្ច អប់រំ និងការប្រយុទ្ធប្រឆាំងនឹងជំងឺកូវីដ-១៩ផងដែ។

ក្នុងជំនួបនោះរដ្ឋមន្ត្រីការបរទេសនៃសាធារណរដ្ឋប្រជាមានិតចិន លោក វ៉ាង យី បានអះអាងថាចិននឹងជួយលើកទឹកចិត្តទេសចរ និងវិនិយោគចិនឱ្យមកកម្ពុជានិងពិចារណាបើកជើងហោះហើរផ្ទាល់ទាំងអស់ រវាងប្រទេសទាំងពីរ ក៏ដូចជាការសម្របសម្រួលឱ្យមានការវិលត្រឡប់របស់និស្សិតកម្ពុជា ទៅសិក្សានៅប្រទេសចិនវិញផងដែរ។

គួររំលឹកផងដែរថា ក្នុងកិច្ចប្រជុំកំពូលពិសេសរំលឹកខួបអនុស្សាវរីយ៍លើកទី៣០ នៃទំនាក់ទំនងដៃគូរអាស៊ាន-ចិន កាលពីថ្ងៃទី២២ ខែវិច្ឆិកាកន្លងទៅ នាយករដ្ឋមន្ត្រីកម្ពុជា សម្ដេចតេជោ ហ៊ុន សែន បានស្នើទៅកាន់ប្រធានាធិបតីនៃសាធារណរដ្ឋប្រជាមានិតចិនឱ្យប្រទេសមហាអំណាចនេះបើកការធ្វើដំណើរចេញចូលរវាងប្រទេសចិន និងអាស៊ានឡើងវិញ ដោយថាដើម្បីពង្រឹង និងលើកស្ទួយនូវវិស័យទេសចរណ៍ សេដ្ឋកិច្ច និងការវិនិយោគរវាងប្រទេសនិងតំបន់ទាំងពីរ៕