ភ្នំពេញ៖ នាយករដ្ឋមន្ត្រីកម្ពុជាបានលើកឡើងថា គាត់នឹងប្រើវិធីរុញទូកបណ្ដោយទឹកដើម្បីឱ្យក្រុមអ្នកវិភាគដែលចូលចិត្តវិភាគតែរឿងគ្រួសាររបស់សម្តេច យកទៅធ្វើការងារវិភាគដោយមិនចាំបាច់ទៅវិភាគរឿងផ្សេងនាំលំបាក។ នេះជាសរសេររបស់នាយករដ្ឋមន្ត្រីកម្ពុជា នៅលើហ្វេសបុកផេកនៅថ្ងៃសៅរ៍ចុងសប្ដាហ៍នេះជាមួយរូបរបស់គាត់ជាមួយភរិយានិងរូបរបស់លោក ហ៊ុន ម៉ាណែតនិងភរិយារបស់គាត់។

សម្ដេចតេជោ ហ៊ុន សែន បានសរសេរទៀតថា គ្រាន់តែរឿងសម្តេចផុសរូបទាក់ទងនឹងក្រុមគ្រួសារក៏អាចធ្វើឱ្យក្រុមអ្នកវិភាគយកទៅវិភាគរកលុយចិញ្ចឹមជីវិតបាន១សប្ដាហ៍ ឬអាចឱ្យគេសុំសិទ្ធិជ្រកកោននៅក្រៅប្រទេសបាន។ សម្តេចបានបញ្ជាក់ថា សម្តេចមានចៅចំនួន២២នាក់ និងមានកូនបង្កើត-កូនប្រសារ១០នាក់ ដូច្នេះនឹងអាចធ្វើឱ្យក្រុមក្រុមវិភាគល្ងង់ទូអាចយកទៅវិភាគបានច្រើន។

សម្ដេចតេជោបានសរសេរយ៉ាងដូច្នេះថា៖ «កន្លងមកមានក្មួយៗដែលនិយមលេងរូបថតបានផ្គុំរូបថតខ្ញុំជាមួយកូនប្រុសច្បងរបស់ខ្ញុំហ៊ុន ម៉ាណែតនិងផ្គុំរូបថតខ្ញុំនិងភរិយាជាមួយរូបថតម៉ាណែតនិងភរិយា។ គាត់បានប្រាប់ខ្ញុំថាលោកអុំសង្ហាដូចបងម៉ាណែតនិងក្មួយខ្លះនិយាយថាអុំប្រុសអុំស្រីសង្ហាដូចបងម៉ាណែតនិងប្រពន្ធគាត់។ ខ្ញុំបានប្រាប់ទៅក្មួយៗវិញថាតើម៉ាណែតបង្កើតអុំឬអុំបង្កើតម៉ាណែត?។ អត្ថបទមួយនេះនឹងធ្វើឱយក្រុមវិភាគយកទៅវិភាគបានហោចណាស់មួយសប្តាហ៍ដើម្បីមានការងារធ្វើរកលុយចិញ្ចឹមជិវិត ឬសុំសិទ្ធជ្រកកោននៅក្រៅប្រទេស។ ថ្ងៃមុនគេវិភាគរឿងចៅទី២១ស្រក់ទឹកភ្នែកតែមិនយំ។ល្អហើយខ្ញុំមានចៅ២២នាក់និងកូនបង្កើតកូនប្រសារ១០នាក់ ទៀតដែលខ្ញុំនឹងជួយពួកអ្នកឱយធ្វើការវិភាគតែរឿងគ្រួសារខ្ញុំដោយមិនចាំបាច់ទៅវិភាគរឿងផ្សេងនាំលំបាក។ នេះជាវិធីរុញទូកបណ្តោយទឹកដើម្បីតម្រូវចិត្តក្រុមវិភាគល្ងង់ទូ»។

ថ្លែងក្នុងពិធីសម្ពោធដាក់ឱ្យប្រើប្រាស់ហេដ្ឋារចនាសម្ព័ន្ធផ្លូវ និងប្រព័ន្ធចំម្រោះទឹកកខ្វក់ក្នុងខេត្តព្រះសីហនុកាលពីថ្ងៃទី២ ខែធ្នូ ឆ្នាំ២០២១ សម្ដេចតេជោ ហ៊ុន សែន បានថ្លែងថាការផុសក្នុងហ្វេសបុកសម្ដេចពេលខ្លះជាការផុសធម្មតានិយាយពីរឿងក្រុមគ្រួសារដូចពលរដ្ឋទូទៅ ណាស់តែអ្នកវិភាគដែលសម្ដេចថាជាក្រុមវិភាគល្ងង់ទូយកទៅវិភាគតាមតែចិត្តរបស់ខ្លួនទាញជារឿងនយោបាយ។ សម្ដេចតេជោចាត់ទុកការវិភាគនេះជាការវិភាគគ្មានន័យ កំប៉ិកកំប៉ុក និងគ្មានយុទ្ធសាស្ត្រវិធីណាតបតនឹងសម្ដេចបាននោះទេ៕