ភ្នំពេញ៖ ប្រធានស្ដីទីគណបក្សហ៊្វុនស៊ិនប៉ិច ព្រះអង្គម្ចាស់ នរោត្តម ចក្រាវុធ អបអរសាទរដល់ លោក ហ៊ុន ម៉ាណែត ដែលត្រូវបានសម្ដេចតេជោ ហ៊ុន សែន ប្រកាសគាំទ្រជាបេក្ខភាពនាយករដ្ឋមន្ត្រីនាថ្ងៃអនាគត ដោយថាលោក ហ៊ុន ម៉ាណែត គឺជាយុវជនដ៏ឆ្នើម និងស័ក្កិសមសម្រាប់តំណែងនេះ។

ក្នុងសារជម្រាបជូនដល់លោក ហ៊ុន ម៉ាណែត ព្រះអង្គម្ចាស់ នរោត្តម ចក្រាវុធ បានអរគុណចំពោះលោក ហ៊ុន ម៉ាណែត ដែលបានអញ្ជើញមកពិនិត្យការត្រៀមរៀបចំពីធីបុណ្យព្រះសពសម្ដេចក្រុមព្រះ នរោត្តម រណឬទ្ធិ នឹងបានសំដែងនូវការគាំទ្រចំពោះការសម្រេចរបស់សម្ដេចតេជោ ហ៊ុន សែន ដែលជ្រើសរើសលោក ហ៊ុន ម៉ាណែត ជាបេក្ខភាពនាយករដ្ឋមន្ត្រីនាថ្ងៃអនាគត។

ព្រះអង្គម្ចាស់ នរោត្តម ចក្រាវុធ បានលើកឡើងថា៖ «ឯកឧត្តមបណ្ដិត គឺជាយុវជនដ៏ឆ្នើមមួយរួបពោពេញដោយសមត្ថភាព ទេពកោសល្យបានបម្រើជាតិនិងទទួលបានបទពិសោធន៍ជាច្រើនពីសម្ដេចតេជោ នាយករដ្ឋមន្ត្រី គឺពិតជាស័ក្កិសមឥតខ្ចោះ ដែលទីពឹងដ៏កក់ក្ដៅសម្រាប់ប្រជារាស្ត្រ និងមាតុភូមិកម្ពុជា នាពេលអនាគតក្នុងការថែរក្សានូវសន្ដិភាព ស្ថេរភាពនយោបាយ និងរបបរាជានិយមជាអមតៈ»។

ថ្លែងក្នុងពិធីសម្ពោធដាក់ឱ្យប្រើប្រាស់នូវហេដ្ឋារចនាសម្ព័ន្ធក្នុងខេត្តព្រះសីហនុកាលពីព្រឹកមិញ សម្ដេចតេជោ ហ៊ុន សែន បានប្រកាសគាំទ្រកូនប្រុសច្បងរបស់សម្ដេចគឺលោក ហ៊ុន ម៉ាណែត ជាបេក្ខភាពនាយករដ្ឋមន្ត្រីតពីសម្ដេច។ ការប្រកាសនេះធ្វើឱ្យមានការសាទរជាបន្តបន្ទាប់ពីជួរថ្នាក់ដឹកនាំ និងមន្ត្រីរាជការនៅកម្ពុជា។

លោក ហ៊ុន ម៉ាណែត អាយុ៤៤ឆ្នាំ គឺជាកូនប្រុសច្បងរបស់នាយករដ្ឋមន្ត្រីកម្ពុជា សម្ដេច តេជោ ហ៊ុន សែន។ លោកជាជនជាតិកម្ពុជាដំបូងដែលបញ្ចប់ការសិក្សានៅឯបណ្ឌិតសភាយោធា West Point របស់សហរដ្ឋអាមេរិក និងជាបណ្ឌិតសេដ្ឋកិច្ចនៃសកលវិទ្យាល័យ Bristol របស់ចក្រភពអង់គ្លេសផងដែរ។ បច្ចុប្បន្នលោក ហ៊ុន ម៉ាណែត មានឋារន្តរស័ក្កិជាឧត្តមសេនីយ៍ឯកផ្កាយ៣ កាន់តួនាទីជាអគ្គមេបញ្ជារងទ័ព និងជាមេបញ្ជាការកងទ័ពជើងគោកនៃកងយុទ្ធពលខេមរភូមិន្ទ៕