ភ្នំពេញ ៖ នៅថ្ងៃទី១៣ ខែឧសភា ឆ្នាំ២០២១នេះ ក្រសួងរៀបចំដែនដី នគរូបនីយកម្ម និងសំណង់ បានចេញសេចក្តីប្រកាសព័ត៌មានបំភ្លឺថា កន្លងមកក្រសួងបានពិនិត្យឃើញ Facebook របស់ឈ្មោះ អាន សំអូន បានបង្ហោះវីដេអូ និងបានលើកឡើងថា ទាហានរំលោភដីប្រជាពលរដ្ឋនៅចំណុចភូមិវាលធំ ឃុំត្រែងត្រយឹង ស្រុកភ្នំស្រួច ខេត្តកំពង់ស្ពឺ។

ក្រសួងដែនដីថាបានចាត់មន្ត្រីឱ្យចុះពិនិត្យស្រាវជ្រាវករណីខាងលើនេះដោយបានរកឃើញថា បុគ្គលដែលបានលើកឡើងក្នុងវីដេអូថា ទាហានរំលោភយកដីគាត់ មានឈ្មោះ ចំរើន និងប្រពន្ធឈ្មោះ ជា សុធា ប្រជាជនមានស្រុកកំណើតនៅខេត្តព្រៃវែង បានមករស់នៅក្នុងសមាគមសង្គ្រោះជនពិការកម្ពុជា នៅចន្លោះឆ្នាំ ២០០៨-២០០៩ និងទទួលបានដីពីសមាគម ទំហំ ៥០មx១៥០ម។

ក្រសួងដែនដីបានបញ្ជាក់ថាឈ្មោះ ឃី ចំរើន អះអាងថា បានទិញដីបន្ថែមពីយោធាដែលជាសមាជិកសមាគមសង្គ្រោះជនពិការកម្ពុជានៅឆ្នាំ២០១១ ប៉ុន្តែពុំមានឯកសារបញ្ជាក់ពីការទិញលក់នោះទេ។

តាមលទ្ធផលវាស់វែងដែលបង្ហាញព្រំដីដោយឈ្មោះ ឃី ចំរើន ផ្ទាល់ឃើញថាដីមានទំហំ១៥៩៣១ម៉ែត្រការ៉េ ក្នុងនោះដីមិនពាក់ព័ន្ធជាមួយមជ្ឈមណ្ឌលអភិវឌ្ឍន៍យោធាមានទំហំ ៤៩៦១ម៉ែត្រការ៉េ និងដីទំហំ១០៩៧០ ម៉ែត្រការ៉េទៀត ជាដីដែលពាក់ព័ន្ធជាមួយមជ្ឈមណ្ឌលអភិវឌ្ឍន៍យធា។

ប្រកាសព័ត៌មានរបស់ក្រសួងដែនដីបញ្ជាក់ទៀតថា វិវាទខាងលើទាក់ទងនឹងការកាន់កាប់ដីរបស់ឈ្មោះ ឃី ចំរើន ជាន់ទៅលើដីរបស់មជ្ឈមណ្ឌលអភិវឌ្ឍន៍យោធា ហើយសកម្មភាពដែលបង្ហាញនៅក្នុងវីដេអូ ជាសកម្មភាពដែលកើតឡើងនៅថ្ងៃទី០៧ ខែឧសភា ឆ្នាំ២០២១ ជាពេលវេលាដែលអាជ្ញាធរ ឃុំត្រែងត្រយឹងចុះទៅហាមឃាត់ឈ្មោះ ឃី ចំរើន មិនឲ្យសាងសង់ផ្ទះចូលក្នុងព្រំដីរបស់មជ្ឈមណ្ឌលអភិវឌ្ឍន៍យោធា៕