ភ្នំពេញ ៖ នាយករដ្ឋមន្ត្រីនៃកម្ពុជាសម្តេចអគ្គមហាសេនាបតីតេជោ ហ៊ុន សែន បានប្រកាសបុគ្គលទី ២លានដែលទទួលការចាក់វ៉ាក់សាំងការពារកូវីដ-១៩នៅកម្ពុជានៅថ្ងៃនេះ១៤ ខែ ឧសភា ២០២១នេះ គឺកញ្ញា ទិត ចិន្តា អាយុ ២៣ឆ្នាំ ជាកម្មការិនីរោងចក្រដែលនឹងទទួលបានរង្វាន់លើកទឹកចិត្តចំនួនទឹកប្រាក់១០លានរៀលទៀត។
"សូមក្មួយស្រី ទិត ចិន្តា ទទួលយករង្វាន់ពី លោកជំទាវ ឱ វណ្ណឌីន ប្រធានគណៈកម្មការចំពោះកិច្ចលើការចាក់វ៉ាក់សាំង។" នេះគឺជាការប្រកាសលើទំព័រហ្វេសបុកផ្លូវការរបស់សម្តេចតេជោនាយករដ្ឋមន្ត្រី។
គួរបញ្ជាក់ផងដែលថា កម្ពុជាបានចាប់ផ្តើមចាក់វ៉ាក់សាំងថ្ងៃ១០ ខែ កុម្ភៈ ២០២១ ដែលម្ជុលទី១បានទៅលោក ហ៊ុន ម៉ាណែត។ នៅថ្ងៃ១១ ខែ មេសា ២០២១ កម្ពុជាបានរកឃើញមនុស្សទី១លាន ដែលបានចាក់វ៉ាក់សាំងការពារជំងឺកូវីដ-១៩គឺលោក ប៉ាន់ សុវណ្ណរិទ្ធិ ដែលបានទទួលបានរង្វាន់១០លានរៀលពីសម្តេចតេជោ ហ៊ុន សែន។
សម្តេចតេជោនាយករដ្ឋមន្ត្រីបានគូសបញ្ជាក់ដែរថា "ក្នុងយុទ្ធសាស្ត្រពន្លត់ភ្លើងល្អជាងអង្គុយបក់ផ្សែង យើងគ្មានជម្រើសណាអោយល្អជាងការខិតខំស្វែងរកវ៉ាក់សាំងចាក់ជូនប្រជាជនយើងនោះទេ។ ការឆ្លងក្នុងសហគមន៍ម្តងហើយម្តងទៀតនៅស្ទើរគ្រប់ប្រទេសតម្រូវអោយយើងខិតខំរកវិធីទប់ស្កាត់ការឆ្លងនិងការបាត់បង់ជីវិតប្រជាជនយើងតាមរយៈការចាក់វ៉ាក់សាំង។"
នាយករដ្ឋមន្ត្រីនៃកម្ពុជា សម្តេចតេជោបានបន្ថែមទៀតថា ក្នុងចំណោមប្រជាជនទាំងចាស់ទាំងក្មេង១៦លាននាក់ មានប្រជាជនដែលមានអាយុ១៨ឆ្នាំឡើងដែលនឹងត្រូវចាក់វ៉ាក់សាំងតែ១០លាននាក់ប៉ុណ្ណោះដែលថ្ងៃនេះយើងចាក់បាន២លាននាក់ស្មើនឹង២០ភាគរយរួចទៅហើយ។ ការចាក់វ៉ាក់សាំងនេះយើងក៏បាននិងកំពុងអនុវត្តយុទ្ធសាស្ត្រផ្ការីក គឺចាក់ពីក្នុងចេញក្រៅ គឺចាក់នៅរាជធានីភ្នំពេញដែលមានមនុស្សរស់នៅកុះករជាមុនបន្ទាប់ទៅនឹងចេញទៅបណ្តាខេត្តទៅតាមលំដាប់អាទិភាព។
សម្តេចតេជោ ហ៊ុន សែន បានអំពាវនាវដល់ប្រជាជនកម្ពុជាថា "សូមកុំបារម្ភ រាជរដ្ឋាភិបាលនឹងចាក់ជូនគ្រប់ៗគ្នាគ្រាន់តែមុននិងក្រោយប៉ុណ្ណោះ"៕
