ខេត្តបាត់ដំបង ៖ នគរបាលប្រឆាំងបទល្មើសសេដ្ឋកិច្ចបានចុះបង្ក្រាបបទល្មើសនេសាទ (ដាក់បរណរវ៉ាវខុសច្បាប់) នៅចំណុចភូមិដូនទ្រី ព្រែកបាក់ស្នរ ត្រណាក់កេះ ក្នុងភូមិសាស្រ្តស្រុកមោងឫស្សី ខេត្តបាត់ដំបង។

នាយការិយាល័យនគរបាលប្រឆាំងបទល្មើសសេដ្ឋកិច្ចនៃស្នងការដ្ឋាននគរបាលខេត្តបាត់ដំបង លោកវរសេនីយ៍ឯក យី យក់សាន បានអោយដឹងថា យុទ្ធនាការបង្ក្រាបករណីបទល្មើសនេសាទខុសច្បាប់ខាងលើនេះធ្វើឡើងកាលពីថ្ងៃទី១៧ ខែវិច្ឆិកា ឆ្នាំ២០២១ នៅក្នុងភូមិសាស្ត្រចំណុចភូមិដូនទ្រី ព្រែកបាក់ស្នរ ត្រណាក់កេះ ស្ថិតក្នុងស្រុកមោងឫស្សី ខេត្តបាត់ដំបង។

លោកបន្ថែមថាថាក្នុងការចុះបង្ក្រាបនេះចាប់បាន សាច់មងទម្ងន់ ៣១ ៥០០គីឡូក្រាម ឡុកចំនួន០៤ឡុក បង្គោលចំនួន ១ ៧០០ដើម

និងប្រលែងកូនត្រីចម្រុះចំនួន៥០គីឡូក្រាមផងដែរ ដោយឡែកសម្ភារៈល្មើសខាងលើក្រុមការងារបានសម្រេចដុតបំផ្លាញចោលនៅកន្លែង។

លោកប្រធានការិយាល័យបានបញ្ជាក់បន្ថែមថា ក្រៅពីបំផ្លាញចោលនូវឧបករណ៍នេសាទខុសច្បាប់នេះ មុខសញ្ញាដែលជាម្ចាស់ទីតាំងប្រព្រឹត្តអំពើល្មើសច្បាប់នេះ ត្រូវបានសមត្ថកិច្ចនគរបាលស្រាវជ្រាដើម្បីរៀបចំសំណុំរឿងបញ្ជូនទៅសាលាដំបូងខេត្តបាត់ដំបងផងដែរ៕