(ប្រទេសឡាវ) ៖​ ភ្លាមៗបន្ទាប់ពីអាជ្ញាធររដ្ឋធានីវៀងច័ន្ទ បានសម្រេចបិទខ្ទប់ (Lock down) រដ្ឋធានីវៀងច័ន្ទ ចាប់អនុវត្តពីថ្ងៃទី១៣ដល់៣០ ខែមេសា ឆ្នាំ២០២១ ស្ថានទូតនៃព្រះរាជាណាចក្រកម្ពុជាប្រចាំនៅសាធារណរដ្ឋប្រជាធិបតេយ្យប្រជាមានិតឡាវ បានប្រកាសជូនបងប្អូនដល់ប្រជាពលរដ្ឋ ពលករ និងនិស្សិតខ្មែរទាំងអស់ដែលកំពុងរស់នៅប្រកបអាជីវកម្ម ធ្វើការ និងសិក្សានៅប្រទេសឡាវ ឲ្យបានដឹងពីការរកឃើញករណីឆ្លងកូវីដ-១៩ ប្រភេទថ្មីពីពាណិជ្ជករថៃម្នាក់កាលពីថ្ងៃទី១១ ខែមេសា ឆ្នាំ២០២១ ដែលបុគ្គលនោះបានចេញ-ចូលទីតាំងជាច្រើនកន្លែងក្នុងរដ្ឋធានីវៀងច័ន្ទ ហើយអាជ្ញាធរឡាវកំពុងធ្វើការស្រាវជ្រាវរកអ្នកពាក់ព័ន្ធជាមួយជនជាតិថៃមួយចំនួនទៀត។

ដើម្បីចូលរួមទប់ស្កាត់កុំឲ្យមានការរីករាលដាលជម្ងឺកូវដី-១៩ ក្នុងប្រទេសឡាវ ស្ថានទូតកម្ពុជាបានណែនាំប្រជាពលរដ្ឋខ្មែរក្នុងប្រទេសឡាវដូចខាងក្រោម៖
-ក្នុងឱកាសចូលឆ្នាំ មិនអនុញ្ញាតឲ្យធ្វើដំណើរចេញ
-ចូលរដ្ឋធានីវៀងច័ន្ទទៅដើរកំសាន្តតាមបណ្តា ខេត្តផ្សេងៗ លើកលែងតែអ្នកជម្ងឺ និងការដឹកជញ្ជូនទំនិញ។
-ផ្អាកធ្វើអាជីវកម្មជាបណ្តោះអាសន្ន
-ហាមជួបជុំគ្នា និងធ្វើទំនាក់ទំនងប្រមូលផ្តុំគ្នាកុះករ ត្រូវអនុវត្តគម្លាតសង្គម
- បើពុំមានការចាំបាច់ សូមកុំធ្វើដំណើរចេញក្រៅផ្ទះនៅក្នុងឱកាសចូលឆ្នាំថ្មី៕