ព្រះសីហនុ៖ អគ្គីភ័យបង្កឡើងដោយទុស្សេខ្សែភ្លើងនិងបន្តឆាបឆេះរាលដាលដល់ផ្ទះពលរដ្ឋ អស់ចំនួន៥ខ្នងផ្ទះ នៅវេលាម៉ោង០៩ព្រឹកថ្ងៃទី៣១ ខែតុលា ឆ្នាំ២០២១ ស្ថិតនៅចំណុច ក្រុម១៣ ភូមិ២ សង្កាត់លេខ១ ក្រុង/ខេត្តព្រះសីហនុ។

ម្ចាស់ផ្ទះដើមហេតុក្នុងចំណោមពលរដ្ឋ ៥ គ្រួសារបានបញ្ចាក់ប្រាប់ឲ្យដឹងថាដំបូងឡើយគឺក្នុងផ្ទះរបស់គាត់បានទុស្សេចរន្តអគ្គិសនីនិងបន្តឆេះរាលដាលដល់ផ្ទះប្រជាពលរដ្ឋ ដទៃទៀត ធ្វើឲ្យខូចខាតទ្រព្យសម្បត្តិអស់ជាច្រើន។

សមត្ថកិច្ចប្រើប្រាស់រថយន្តពន្លត់អគ្គីភ័យអស់ចំនួន៧គ្រឿងដើម្បីពន្លត់ភ្លើងនេះ ខណៈតម្លៃនៃការខូចខាតនៅមិនទាន់វាយតម្លៃបាននៅឡើយទេ។

ក្រោយពេលកើតហេតុលោក សន កុសល អភិបាលរងក្រុងព្រះសីហនុ តំណាងឲ្យលោក អ៉ី សុខឡេង អភិបាលក្រុងព្រះសីហនុ បានបន្តជួយ ឧបត្ថម្ភថវិការដល់ពលរដ្ឋចំនួន៥គ្រួសារ ក្នុង១គ្រួសារបានចំនួន ២៥ម៉ឺនរៀល និងមានការចូលរួម ឧបត្ថម្ភបន្ថែមពីលោក ឈិត សូផាត ចៅសង្កាត់លេខ១ ក្នុង១គ្រួសារចំនួន ១០ម៉ឺនរៀល ដើម្បីទុកទ្រទ្រង់ក្នុងគ្រួសារជាបណ្ដោះអាសន្ន៕