(ភ្នំពេញ) ៖ បន្ទាប់ពីការអំពាវនាវសម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ក្នុងឱកាសថ្លែងសារពិសេសជូនជនរួមជាកាលពីថ្ងៃទី១០ ខែមេសា ឆ្នាំ២០២១ពាក់ព័ន្ធស្ថានការណ៍ព្រឹត្តិការណ៍ ២០ កុម្ភៈរួចមក សមាគមធនាគារនៅកម្ពុជា និងសមាគមមីក្រូហិរញ្ញវត្ថុកម្ពុជា បានចេញសេចក្តីថ្លែងការណ៍បន្ថែម នៅថ្ងៃទី១២ មេសា ២០២១ ដោយបានថ្លែងអំណរគុណសម្តេចតេជោ នាយករដ្ឋមន្ត្រី ក្នុងការបានគាំទ្រដល់វិស័យធនាគារនិងមីក្រូហិរញ្ញវត្ថុ ក្នុងកិច្ចខិតខំប្រឹងប្រែងជួយអតិថិជនដែលរងផលប៉ះពាល់ដោយសារជំងឺកូវីដ-១៩នាពេលកន្លងមក។

ក្នុងសេចក្តីថ្លែងការណ៍តបទៅនឹងអនុសាសន៍ដ៏ខ្ពង់ខ្ពស់របស់សម្តេចតេជោ នាយករដ្ឋមន្ត្រី សមាគមទាំងពីរបាន “ទទួលយកនិងអនុវត្តតាម” ដោយធ្វើបច្ចុប្បន្នភាពកែសម្រួលបន្ថែមនូវគោលការណ៍ដែលបានចេញផ្សាយ កាលពីថ្ងៃទី៧ ខែមេសា ឆ្នាំ២០២១ ដល់អតិថិជនដែលឆ្លងជំងឺកូវីដ -១៩ ដោយបានលើកលែងការបង់ការប្រាក់រយៈពេល២ខែ ហើយសម្រាប់អតិថិជនដែលជាប់ធ្វើចត្តាឡីស័កនឹងផ្តល់ការរៀបចំឥណទានឡើង វិញដោយស្វ័យប្រវត្តិ (ប្រសិនបើអតិថិជនយល់ព្រម) រួមទាំងពន្យារការបង់ទាំងប្រាក់ដើមរយៈពេល៣ ខែ។

សេចក្តីថ្លែងការណ៍បានសរសេរបញ្ជាក់បន្ថែមទៀតដែលថា ក្នុងករណីចាំបាច់នានាដែលជាតម្រូវការរបស់អតិថិជនដែលរងផលប៉ះពាល់ដោយជំងឺកូវីដ-១៩ សូមធ្វើការពិភាក្សាដោយផ្ទាល់ជាមួយគ្រឹះស្ថានធនាគារ និងមីក្រូហិរញ្ញវត្ថុ។ សមាគមបានបញ្ជាក់ជំហរជាថ្មីថា ក្នុងរយៈពេលដ៏លំបាកនេះនឹងមិនមានការផាកពិន័យចំពោះអតិថិជនដែលរងផលប៉ះពាល់ដោយជំងឺកូវីដ-១៩៕