ភ្នំពេញ៖ ក្រសួងសេដ្ឋកិច្ចនិងហិរញ្ញវត្ថុបើកឲ្យដំណើការនូវប្រព័ន្ធស្នើសុំលិខិតបញ្ជាក់លើការធានានិងលិខិតបញ្ជាក់លើការអញ្ជើញ ដើម្បីសម្រួលដល់ការធ្វើចត្តាឡីស័កដល់អ្នកដំណើរបរទេសដែលជាអ្នកវិនិយោគ បុគ្គលិកជំនាញ និងក្រុមគ្រួសារចូលមកកម្ពុជា។

ក្នុងសេចក្ដីប្រកាសចុះថ្ងៃទី១៧ ខែតុលា ក្រសួងសេដ្ឋកិច្ចបានបញ្ជាក់ថា យន្តការនៃការធានានិងអញ្ជើញនេះធ្វើឡើងនៅលើការផ្លាស់ប្ដូរទិន្នន័យកម្ពុជាតាមរយៈគេហទំព័រ www.registrationservices.gov.kh ទៅលើអ្នកដំណើរជាជនជាតិខ្មែរនិងបរទេសដែលជាអ្នកវិនិយោគបុគ្គលិកជំនាញនិងក្រុមគ្រួសារ ដែលត្រូវការធានា ឬអញ្ជើញពីដៃគូក្នុងស្រុក ជានីតិបុគ្គលស្របច្បាប់មានការចុះបញ្ជីនិងបង់ពន្ធត្រឹមត្រូវ។

ក្រសួងសេដ្ឋកិច្ចបានបញ្ជាក់ថា៖ «លិខិតបញ្ជាក់ទាំងពីរប្រភេទមានសុពលភាព ៣០ថ្ងៃដែលអាចប្រើប្រាស់បានតែមួយដងគត់និងមានទម្រង់ ឌីជីថលដែលអ្នកដំណើរអាចទាញយកនិងបោះពុម្ពបានដោយខ្លួនឯងតាមគេហទំព័រខាងលើមុនធ្វើដំណើរកម្ពុជា»។

កាលពីម្សិលមិញរាជរដ្ឋាភិបាលកម្ពុជាបានសម្រេចកាត់បន្ថយថ្ងៃធ្វើចត្តាឡីស័កចំពោះជនបរទេសនិងពលរដ្ឋខ្មែរដែលបានចាក់វ៉ាក់សាំងពេញលេញដែលចូលមកកម្ពុជា ៧ថ្ងៃសម្រាប់ពលរដ្ឋធម្មតា និង៣ថ្ងៃសម្រាប់អ្នកវិនិយោគ អ្នកបច្ចេកទេសទាំងខ្មែរនិងបរទេស មន្ត្រីការទូត មន្ត្រីអនុវត្តគម្រោងសហប្រតិបត្តិការ និងមន្ត្រីរដ្ឋាភិបាលដែលត្រឡប់ពីបេសកកម្មក្រៅប្រទេស៕