ប៉ៃលិន៖ បុរសម្នាក់ត្រូវទឹកស្ទឹងភ្នំដំបងជាប់ព្រុំប្រទល់ស្រុកសំឡូតកួចហូរទៅបាត់ បន្ទាប់ពីចុះទៅតោងយកឈើដែលអណ្ដែតក្នុងស្ទឹង។

សមត្តកិច្ចខេត្តប៉ៃលិនឲ្យដឹងថា បុរសម្នាក់ដែលបាត់ខ្លួននោះមានឈ្មោះ ណាង ស៊ីណាល់ ភេទប្រុស អាយុ៤៤ឆ្នាំ ត្រូវបានទឹកហូរនាំពេលចុះទៅយកឈើនៅវេលាម៉ោង១០ និង៤៧នាទី ថ្ងៃទី១៥ ខែតុលា ឆ្នាំ២០២១ស្ថិតនៅចំណុចភ្នំដំបង ភូមិក្រចាប់ សង្កាត់អូរតាវ៉ៅ ក្រុងប៉ៃលិន ខេត្តប៉ៃលិន។

ពលរដ្ឋបានឃើញហេតុការណ៍នេះលោក ស៊ាង ម៉ាល័យ បានរៀបរាប់ថា រូបគាត់បានឃើញបុរសម្នាក់ឈរនៅម្ខាងនៃស្ទឹងបានចុះក្នុងស្ទឹងដែលទឹកកំពុងហូរឡើងខ្លាំង ដើម្បីចុះចាប់ឈើដែលអណ្តែតមកតាមទឹកស្ទឹង ហើយក៏លិចទៅតាមឈើបាត់ទៅ បន្ទាប់មកខ្លួនក៏បានស្រែកនៅឱ្យគេជួយ រួចក៏រាយការណ៍ទៅសមត្ថកិច្ច។

បច្ចុប្បន្នកម្លាំងប៉ុស្តិ៍រដ្ឋបាលសង្កាត់អូរតាវ៉ៅ និងប្រជាការពារភូមិព្រមទាំងប្រជាពលរដ្ឋកំពុងចុះពិនិត្យរកមើលបន្តនៅតាមមាត់ស្ទឹងទីតាំងកើតហេតុខាងលើ៕