(ភ្នំពេញ)៖ ផ្សាររបស់រដ្ឋទាំងអស់នៅក្នុងរាជធានីភ្នំពេញ នៅបន្តបិទដោយមិនមានពេលកំណត់។ វិធានការបន្តបិទផ្សារនេះដើម្បីទប់ស្កាត់ការឆ្លងរាលដាលជំងឺកូវីដ-១៩។ នេះបើតាមលោក កើត ឆែ អភិបាលរងរាជធានីភ្នំពេញក្នុងសន្និសីទកាសែត នៅព្រឹកថ្ងៃទី០៦ ខែឧសភា ឆ្នាំ២០២១។
លោក កើត ឆែ លើកឡើងថា ផ្សាររបស់រដ្ឋដែលបានផ្អាកសកម្មភាពជាបណ្តោះអាសន្នជាបន្តបន្ទាប់ចាប់តាំងពីថ្ងៃទី០៤ ខែមេសា រហូតដល់ពេលនេះ គឺមិនទាន់បើកដំណើរការឡើងវិញទេ។
លោក កើត ឆែ បានបន្តទៀតថា នៅពេលកន្លងមកនេះសូម្បីតែអ្នកលក់ដូរនៅជុំវិញពេទ្យលោកសង្ឃ (មន្ទីរពេទ្យមិត្តភាពកម្ពុជា-ចិន ព្រះកុសុមៈ) និង អ្នកលក់ដូរនៅពេទ្យកាល់ម៉ែត្រក៏ឆ្លងកូវីដ-១៩ដែរ ។ ក្នុងនោះ អ្នកផ្សារនៅច្បារអំពៅក៏បានឆ្លងកូវីដច្រើននាក់នៅពេលទៅធ្វើតេស្តទើបដឹង ។
អភិបាលរងរាជធានីភ្នំពេញ លោក កើត ឆែ ថានៅពេល ស្ថានភាពធូរស្បើយទើបយើងពិចារណាបើកដំណើរការផ្សារក្នុងរាជធានីភ្នំពេញឡើងវិញ៕
