ភ្នំពេញ៖ វិសោធនកម្មរដ្ឋធម្មនុញ្ញ ដែលតម្រូវឲ្យថ្នាក់ដឹកនាំកំពូលមានសញ្ជាតិខ្មែរតែមួយគត់ត្រូវបានសភាទទួលយកហើយនិងគ្រោងប្រជុំពេញអង្គអនុម័តនៅចុងខែនេះ។

អ្នកនាំពាក្យរដ្ឋសភាលោក ឡេង ប៉េងឡុង បានប្រាប់ EAC News ថាសេចក្ដីព្រាងច្បាប់ធម្មនុញ្ញដែលត្រូវបានគណៈរដ្ឋមន្ត្រីពិនិត្យអនុម័តរួចកាលពីថ្ងៃទី៨ ខែតុលាកន្លងទៅត្រូវបានបញ្ជូនមកសភារួចហើយ ខណៈសភាកំពុងរៀបចំធ្វើការនេះឱ្យលឿនបំផុតតាមដែលអាចធ្វើទៅរួច។ លោកបញ្ជាក់ថា តាមគម្រោងគណៈអចិន្ត្រៃយ៍សភានឹងប្រជុំពិនិត្យនៅថ្ងៃទី១៤ ខែតុលា រួចបញ្ជូនទៅគណៈកម្មាការជំនាញដើម្បីពិនិត្យនៅសប្ដាហ៍ក្រោយ។

បើតាមលោក ឡេង ប៉េងឡុង ដោយសារវិសោធនកម្មនេះត្រូវចែងថាជាការប្រញាប់ដូច្នេះអាចនឹងត្រូវសភាបើកសម័យប្រជុំពេញអង្គនៅចុងខែនេះ។

លោកថា៖ «ច្បាស់ហើយដោយសារច្បាប់នេះជាការប្រញាប់ដូច្នេះហើយ យើងស្នើឱ្យគណៈកម្មាការជំនាញលោកសិក្សាឱ្យបានឆាប់ទៅ។ ឥឡូវបើសិនជាអាទិត្យក្រោយគាត់សិក្សាគាត់មានពេលតែ៣ទៅ៤ថ្ងៃទេ»។

កាលពីម្សិលមិញ ព្រះមហាក្សត្រកម្ពុជា ព្រះករុណាព្រះបាទសម្ដេចព្រះបរមនាថ នរោត្តម សីហមុនី បានរាជានុញ្ញាតឱ្យ សម្ដេចតេជោ នាយករដ្ឋមន្ត្រី បន្តដំណើរការធ្វើវិសោធនកម្មសេចក្ដីព្រាងរដ្ឋធម្មនុញ្ញដែលតម្រូវឲ្យថ្នាក់ដឹកនាំកំពូលត្រូវមានសញ្ជាតិខ្មែរតែមួយ បន្ទាប់ពីព្រះអង្គទទួលបានការទូលថ្វាយពីក្រុមប្រឹក្សាធម្មនុញ្ញដែលប្រកាសថាច្បាប់នេះអាចធ្វើទៅបាន។

សេចក្ដីព្រាងច្បាប់ធម្មនុញ្ញស្ដីពីវិសោធនកម្មមាត្រា១៩ថ្មី ៨២ថ្មី ១០៦ថ្មី(មួយ) មាត្រា១១៩ថ្មី និងមាត្រា១៣៧ថ្មី នៃរដ្ឋធម្មនុញ្ញ និងមាត្រា៣និងមាត្រា៤ នៃច្បាប់ធម្មនុញ្ញបន្ថែមសំដៅធានានូវដំណើរការជាប្រក្រតីនៃស្ថាប័នជាតិត្រូវបានគណៈរដ្ឋមន្ត្រីពិនិត្យអនុម័តរួចកាលពីថ្ងៃទី៨ ខែតុលាកន្លងទៅ។ គោលបំណងនៃការធ្វើច្បាប់នេះគឺសំដៅធានានូវដំណើរការជាប្រក្រតីនៃស្ថាប័នជាតិ ក៏ដូចជាដើម្បីបង្ហាញនូវការស្មោះត្រង់ចំពោះជាតិនិងបញ្ជៀសនូវការជ្រៀតជ្រែកពីបរទេស៕