ភ្នំពេញ៖​ ក្រសួងការងារបានស្នើដល់ម្ចាស់រោងចក្រសហគ្រាសទាំងអស់ឱ្យអនុញ្ញាតថ្ងៃឈប់សម្រាកដោយមានប្រាក់ឈ្នួលដល់កម្មករ និយោជិត ដែលបានឈប់សម្រាកនៅថ្ងៃចាក់វ៉ាក់សាំងដូសជំរុញ។

ក្នុងសេចក្ដីជូនដំណឹងចុះថ្ងៃទី១១ ខែតុលា ឆ្នាំ២០២១ រដ្ឋមន្ត្រីក្រសួងការងារលោក អ៉ិត សំហេង បានស្នើ់ដល់ម្ចាស់រោងចក្រសហគ្រាសទាំងអស់ឱ្យអនុញ្ញាតដល់កម្មករឱ្យបានទៅចាក់វ៉ាក់សាំងដូសជំរុញជាមួយការឈប់សម្រាក ១ថ្ងៃដោយមានប្រាក់ឈ្នួល ដោយថាជាប្រយោជន៍របស់ម្ចាស់រោងចក្រសហគ្រាស និងជួយទប់ស្កាត់ការឆ្លងរាលដាលនៃជំងឺកូវីដ-១៩ នៅក្នុងប្រទេស។

កម្ពុជាចាប់ផ្ដើមយុទ្ធនាការចាក់វ៉ាក់សាំងដូសជំរុញការពារជំងឺកូវីដ-១៩ ដោយឥតគិតថ្លៃជូនដល់ពលរដ្ឋចាប់ពីថ្ងៃទី១១ ខែតុលា នេះតទៅ ដល់ប្រជាពលរដ្ឋគ្រប់រូបដែលបានចាក់វ៉ាក់សាំងដូសទី១ និងទី២រួច។

គិតត្រឹមថ្ងៃទី១០ ខែតុលា ពលរដ្ឋកម្ពុជាដែលស្ថិតក្នុងក្រុមអទិភាពចំនួនជាង ៩២ម៉ឺននាក់បានចាក់វ៉ាក់សាំងដូសទី៣រួចរាល់៕