ឥណ្ឌា៖ កសិករចំនួន ៦នាក់បានស្លាប់បាត់បង់ជីវិតក្នុងហេតុការណ៍អំពើហិង្សាមួយនៅរដ្ឋ Uttar Pradesh កាលពីថ្ងៃអាទិត្យកន្លងទៅ បន្ទាប់ពីរថយន្តមួយគ្រឿងដែលគេជឿថាមានពាក់ព័ន្ធនឹងរដ្ឋមន្រ្តីសហព័ន្ធបានបើកបុកសំដៅទៅលើហ្វូងបាតុករដែលជាកសិករប្រមូលផ្តុំគ្នាធ្វើបាតុកម្ម ជំទាស់ទៅនឹងច្បាប់កសិកម្មថ្មីដែលកំពុងមានភាពចម្រូងចម្រាស់។

ក្រុមកសិករបានចោទប្រកាន់ថា​ រថយន្តដែលបានបើកបំបុកកសិករចំនួន ២នាក់ស្លាប់់នោះ គឺជាកម្មសិទ្ធិរបស់កូនប្រុសលោក Ajay Mishra រដ្ឋមន្រ្តីមួយរូបក្នុងជួររដ្ឋាភិបាលឥណ្ឌា។ ដោយឡែក លោករដ្ឋមន្រ្តី Ajay Mishra បានបញ្ជាក់់ប្រាប់ថា កូនប្រុសរបស់លោកពុំមានវត្តមានក្នុងហេតុការណ៍គ្រោះថ្នាក់នេះឡើយ ប៉ុន្តែរថយន្តនោះត្រូវបានបើកដោយអ្នកបើកបររបស់លោក ដែលហាក់បាត់បង់ម្ចាស់ការរហូតជ្រុលទៅបុកមនុស្សនៅក្បែរនោះ ក្រោយពីមានក្រុមមនុស្សមិនស្គាល់អត្តសញ្ញាណបានវាយ​ប្រហារសំដៅមកលើរថយន្តនោះដោយវត្ថុផ្សេងៗដូចជាដុំថ្ម និងដំបងជាដើម។ លោកថែមទាំងលើកឡើងទៀតថា ប្រសិនបើកូនប្រុសរបស់លោកមានវត្តមានក្នុងហេតុការណ៍នៅពេលនោះ គេប្រហែលជាស្លាប់បាត់ដែរទៅហើយក៏ថាបាន។

បើតាមសមត្ថកិច្ចក្នុងតំបន់បានឱ្យដឹងថា ក្រៅពីកសិករទាំង ២ដែលបានស្លាប់ សមាជិកនៃគណបក្ស Bharatiya Janata ចំនួន ៣នាក់ និងអ្នកបើករថយន្តម្នាក់បានស្លាប់ក្នុងហេតុការណ៍ប៉ះទង្គិចនេះ សរុបចំនួន ៦នាក់។ ការស៊ើបអង្កេតរកដើមចមនៃហេតុការណ៍នេះ កំពុងស្ថិតក្នុងការដំណើរការហើយ នេះបើតាមការបញ្ជាក់ពីមន្រ្តីប៉ូលិស។

ការតវ៉ាពីសំណាក់ក្រុមបាតុករដែលភាគច្រើនជាកសិករបានអូសបន្លាយអស់រយៈពេលរាប់ខែមកហើយ ដោយក្រុមកសិកររាប់ម៉ឺននាក់បានព្យាយាមបិទផ្លូវសំខាន់ៗដែលឆ្ពោះទៅកាន់ទីក្រុងញ៉ូវដេលី ក្នុងគោលដៅជំទាស់ទៅនឹងច្បាប់ថ្មីចំនួន ៣ ពាក់ព័ន្ធនឹងវិស័យកសិកម្ម។ កសិកររបស់ឥណ្ឌាបានអះអាងថា ច្បាប់នេះនឹងបំផ្លាញយន្តការយូរអង្វែងដែលផ្តល់ឱ្យកសិករនូវតម្លៃធានាអប្បបរមាសម្រាប់ផលិតផលកសិកម្មរបស់គេ។ ផ្ទុយពីនេះ ក្រុមអ្នកធ្វើច្បាប់របស់រដ្ឋាភិបាលបានអះអាងថា ច្បាប់ថ្មីនេះនឹងជួយឱ្យតម្លៃកសិផលរបស់ប្រជាជននឹងកាន់តែមានការកើនឡើងខ្ពស់៕