ព្រះសីហនុ៖ រដ្ឋបាលខេត្តព្រះសីហនុ នៅថ្ងៃទី៣០ ខែកញ្ញា ឆ្នាំ២០២១នេះ បានជូនដំណឹងស្តីពីការរៀបចំទីតាំងចំនួន ២កន្លែងក្នុងខេត្តព្រះសីហនុ សម្រាប់ការយកសំណាកជូនបងប្អូនប្រជាពលរដ្ឋ ដែលសង្ស័យថាខ្លួនបានឆ្លងនូវវីរុសកូវីដ-១៩។ តាមលិខិតជូនដំណឹងដដែលបានបញ្ជាក់ថា ទីតាំងចំនួន ២កន្លែងដែលរៀបចំនេះ នឹងមានទទួលយកសំណាកជូនបងប្អូនប្រជាពលរដ្ឋជារៀងរាល់ថ្ងៃ បូករួមទាំងថ្ងៃឈប់សម្រាកផងដែរ។

ទីតាំងសម្រាប់ការផ្តល់វត្ថុសំណាកដើម្បីពិនិត្យរកវីរុសកូវីដ-១៩ រួមមាន៖

ទីតាំងទី១ ស្ថិតនៅមន្ទីរសុខាភិបាលខេត្តព្រះសីហនុ ដែលមានទីតាំងនៅភូមិ៤ សង្កាត់លេខ៤ ក្រុងព្រះសីហនុ។

ទីតាំងទី២ នៅវេទិកា ៧មករា ស្ថិតនៅភូមិ១ សង្កាត់លេខ៣ ក្រុងព្រះសីហនុ។ 

ក្នុងករណីដែលបងប្អូនធ្លាប់បានប៉ះពាល់ជាមួយអ្នកជំងឺកូវីដ-១៩ ហើយសង្ស័យថាបានឆ្លងជំងឺកូវីដ-១៩ ដោយមានអាការៈមិនស្រួលខ្លួនដូចជា ក្តៅខ្លួនលើសពី ៣៧,៥ អង្សាសេ មានក្អកផ្តាសាយ ឬមានស្លេស្ម ...។ល។ ត្រូវប្រញាប់រួសរាន់ទៅផ្តល់វត្ថុសំណាកដើម្បីវិភាគរកមេរោគកូវីដ-១៩កុំបីខាន ដែលនេះគឺជាផ្នែកមួយនៃការសហការដើម្បីធានាឱ្យមានការបើកដំណើរឡើងវិញនូវសេដ្ឋកិច្ច សង្គម និងជីវភាពរស់នៅរបស់បងប្អូនប្រជាពលរដ្ឋទាំងអស់៕

ព័ត៌មានលម្អិតសូមអានសេចក្តីជូនដំណឹងនៅខាងក្រោម៖