សហរដ្ឋអាមេិក៖ ក្រុមហ៊ុនអាកាសចរណ៍អាមេរិក (United Airlines) នឹងបញ្ឈប់បុគ្គលិករបស់ខ្លួនចំនួន ៥៩៣នាក់ ដែលពួកគេទាំងនោះបានបដិសេធមិនទទួលវ៉ាក់សាំងកូវីដ-១៩ តាមលក្ខខណ្ឌដែលក្រុមហ៊ុនតំរូវ។ នេះបើតាមការបញ្ជាក់ផ្លូវការរបស់ក្រុមហ៊ុន United Airlines កាលពីថ្ងៃអង្គារម្សិលមិញនេះ។

ក្រៅពីបុគ្គលិកជិត ៦០០នាក់ដែលបានបដិសេធមិនចាក់វ៉ាក់សាំងនេះ នៅមានបុគ្គលិកនិយោជិតប្រមាណ ២,០០០នាក់ផ្សេងទៀតបានស្នើឱ្យមានការលើកលែងដោយសារកត្តាសុខភាពផ្ទាល់ខ្លួន ព្រមទាំងពាក់ព័ន្ធនឹងកត្តាសាសនាជាដើម ដែលនាំឱ្យពួកគេមិនអាចទទួលវ៉ាក់សាំងកូវីដ-១៩បាន។ ចំនួនសរុបនៃបុគ្គលិកដែលបដិសេធមិនចាក់វ៉ាក់សាំង បូកជាមួយអ្នកស្នើសុំលក្ខខណ្ឌលើកលែង មានចំនួនជិត ៣ភាគរយនៃចំនួនបុគ្គលិករបស់ United Airlines ដែលមានបុគ្គលិកសរុបជាង ៦៧,០០០នាក់។

កាលពីខែសីហាកន្លងទៅ ក្រុមហ៊ុនអាកាសចរណ៍អាមេរិកក៏បានតម្រូវឱ្យបុគ្គលិកជាជនជាតិអាមេរិកទាំងអស់ទទួលនូវវ៉ាក់សាំងកូវីដ-១៩ និងតម្រូវឱ្យមានការបង្ហោះឯកសារពាក់ព័ន្ធនឹងការចាក់វ៉ាក់សាំងរួចរាល់ ចូលក្នុងប្រព័ន្ធផ្ទុកទិន្នន័យរបស់ក្រុមហ៊ុនផងដែរ។ យ៉ាងណាក្តី ទន្ទឹមនឹងការត្រៀមបញ្ឈប់បុគ្គលិកចំនួនជិត ៦០០នាក់នេះ ក្រុមហ៊ុនក៏បានកំពុងសិក្សាជុំវិញសំណើរលើកលែងជិត ២,០០០នាក់ផ្សេងទៀតផងដែរ។

សេចក្តីជូនដំណឹងរបស់ក្រុមហ៊ុនបានឱ្យដឹងថា នេះគឺជាព្រឹត្តិការណ៍ជាប្រវត្តិសាស្រ្ត ដោយចំណាត់ការនេះធ្វើឡើងដើម្បីសុវត្ថិភាពរបស់ក្រុមហ៊ុន បុគ្គលិកគ្រប់ផ្នែក ព្រមទាំងអតិថិជនទាំងអស់ដែលធ្វើដំណើរជាមួយជើងហោះហើររបស់យើង។ ក្រុមហ៊ុន United Airlines បានបញ្ជាក់ទៀតថា គម្រោងនៃការបញ្ឈប់បុគ្គលិកនេះ គឺការជាសម្រេចចិត្តដ៏លំបាកមួយ។ យ៉ាងណាក្តីនេះគឺជាការព្រួយបារម្ភ និងការពារទៅលើសុខុមាលភាព និងសុវត្ថិភាពរបស់បុគ្គលិកផ្សេងៗទៀត ដែលជាអាទិភាពទីមួយរបស់ក្រុមហ៊ុនផ្ទាល់៕