ខេត្តព្រះសីហនុ ៖ នៅថ្ងៃទី៣ ខែឧសភា ឆ្នាំ២០២១នេះ រដ្ឋបាលខេត្តព្រះសីហនុ បានប្រកាសផ្អាកជាបណ្តោះអាសន្នដំណើរការអាជីវកម្មរោងចក្រ ដាប់ប៊ែលយូអីជីស៊ី មេនូហ្វេកធើរីង មានទីតាំងស្ថិតនៅក្នុងតំបន់សេដ្ឋកិច្ចពិសេសក្រុងព្រះសីហនុ ផ្លូវជាតិលេខ៤ ភូមិពូធឿង ឃុំបិតត្រាំង ស្រុកព្រៃនប់។

រដ្ឋបាលខេត្តព្រះសីហនុ បានឱ្យដឹងថា ក្រុមការងារឆ្លើយតបបន្ទាន់នៃមន្ទីរសុខាភិបាលខេត្តបានយកវត្ថុសំណាកពីកម្មករបម្រើការងារនៅរោងចក្រ ដាប់ប៊លយូអី ជីស៊ី មេនូហ្វេកធើរីង ជាលទ្ធផលបញ្ជាក់ថាមានវិជ្ជមានវីរុសកូវីដ-១៩។

រដ្ឋបាលខេត្តព្រះសីហនុណែនាំថា ដើម្បីទប់ស្កាត់ការរីករាលដាលជំងឺកូវីដ១៩ បន្ថែមទៀតដល់កម្មករនៅក្នុងរោងចក្រ រដ្ឋបាលខេត្តព្រះសីហនុសម្រេចផ្អាកជាបណ្ដោះអាសន្នដំណើរការអាជីវកម្មរោងចក្រ ដាប់ប៊លយូអីជីស៊ី មេនូហ្វេកធើរីង រយៈពេល ៤ថ្ងៃចាប់ពីថ្ងៃជូនដំណឹងនេះតទៅ។

រដ្ឋបាលខេត្តព្រះសីហនុ បានបញ្ជាក់ទៀតថា ក្នុងអំឡុងពេល ៤ថ្ងៃនេះ តម្រូវឱ្យលោកនាយករោងចក្រ សហការជាមួយក្រុមការងារនៃមន្ទីរការងារ និងបណ្តុះបណ្តាលវិជ្ជាជីវៈខេត្ត ដើម្បីស្វែងរកអ្នកដែលមានការពាក់ព័ន្ធជាមួយអ្នកវិជ្ជមានកូវីដ-១៩ ដើម្បីផ្ដល់វត្ថុសំណាក់ដល់ក្រុមឆ្លើយតបបន្ទាន់នៃមន្ទីរសុខាភិបាលខេត្តដើម្បីវិភាគរកមេរោគកូវីដ-១៩ តាមការកំណត់។ 

ចំពោះបុគ្គលិក កម្មករ និយោជិតទាំងអស់របស់រោងចក្រត្រូវផ្អាកការចេញ-ចូលរោងចក្រ ហើយនៅក្រោយពេលបានផ្ដល់វត្ថុសំណាករួចរាល់ ត្រូវសម្រាកនៅផ្ទះរង់ចាំរហូតដល់ការធ្វើវិភាគលើវត្ថុសំណាករបស់កម្មករនៅក្នុងរោងចក្រដែលមានការពាក់ព័ន្ធគ្រប់ៗគ្នា និងមានលទ្ធផលជាផ្លូវការ ទើបអាចបន្តការងារជាថ្មីតាមការជូនដំណឹងរបស់រដ្ឋបាលខេត្តព្រះសីហនុ។

អភិបាលខេត្តខេត្តព្រះសីហនុ លោក គួច ចំរើន បានព្រមានថា ក្នុងករណីប្រធានរោចក្រមិនអនុវត្តតាមការណែនាំខាងលើ រដ្ឋបាលខេត្តព្រះសីហនុនឹងចុះអនុវត្តវិធានការតាម នីតិវិធីច្បាប់ជាធរមាន៕