អង់គ្លេស៖ Manchester City ទើបតែបានបំបាក់ និងសងសឹកលើតោខៀវ Chelsea ដល់ទឹកដីក្នុងជ័យជម្នះ ១-០ ខណៈលោក Pep Guardiola បានលើកសរសើរមិនដាច់ពីមាត់ចំពោះទម្រង់លេងរបស់កីឡាករ Bernardo Silva ដែលបានបំពេញយ៉ាងល្អនូវតំណែងខ្សែបម្រើកណ្តាល និងជាចំណែកមិនអាចខ្វះបាន ក្នុងជ័យជម្នះដ៏សំខាន់នេះ។

មែនទែនទៅ! កីឡាករសញ្ជាតិព័រទុយហ្គាល់ខាងលើមានតួនាទីជាខ្សែបម្រើប្រយុទ្ធនោះទេសម្រាប់ការបង្ហាញខ្លួនកន្លងមក ប៉ុន្តែយ៉ាងណាក្តី ក្នុងជំនួបទល់នឹង Chelsea នេះ Pep បានទាញយក Silva ទៅរ៉ាប់រងតំបន់បម្រើជាមួយនឹង Pedri ដែលហាក់ជាយុទ្ធសាស្រ្តល្អមួយ ដែលនាំឱ្យ Man City ឡើងទៅឈរនៅចំណាត់ថ្នាក់លេខ ២ នៅក្នុងតារាង English Premier League នៅសប្តាហ៍ទី៦នេះ។

"Silva ជាកីឡាករដ៏ល្អ ជាមួយទម្រង់លេងដ៏អស្ចារ្យ" Pep បាននិយាយក្នុងសន្និសីទសារព័ត៌មានក្រោយចប់ការប្រកួតទល់នឹង Chelsea។ Pep បានលើកឡើងបន្ថែមថា Silva ជាកីឡាករដែលអាចសម្រេចចិត្តបានលឿន និងរហ័សល្អ ទោះបីជាជំហរដែលគេរ៉ាប់រងនោះមិនមែនជាកន្លែងដែលគេធ្លាប់រ៉ាប់រងក៏ដោយ ប៉ុន្តែគេអាចគ្រប់គ្រងស្ថានការបានយ៉ាងឥតខ្ចោះ និងអាចពិចារណាថានឹងត្រូវធ្វើអ្វីបន្តបានទាំងពេលមានបាល់  និងពេលបាត់បាល់។

Silva បានរួមចំណែកជួយក្លិប Manchester City ឈ្នះជើងឯកអង់គ្លេសកាលពីរដូវកាល ២០២០/២១ កន្លងទៅ ខណៈកីឡាករវ័យ ២៧ឆ្នាំរូបនេះ បានបង្ហាញទម្រង់លេងកម្រិតកំពូលក្នុងរដូវកាលដែល Manchester City គ្រងជើងឯកលីគកំពូលអង់គ្លេសនៅឆ្នាំ២០១៩ ជាមួយពិន្ទុសរុប ៩៨ពិន្ទុ។ ស្របពេលមានដំណឹងដែលកីឡាកររូបនេះអាចនឹងចាកចេញ លោក Pep បានលើកឡើងថា លោកគោរពទៅតាមការសំរេចចិត្តរបស់កីឡាករ ខណៈលោកជឿថាក្លិបណាដែលអាចនាំយក Silva ទៅចូលរួមបាន ប្រាកដណាស់ក្លិបនោះនឹងទទួលបានកីឡាករលំដាប់ពិភពលោកម្នាក់ទៅចូលរួម!៕