ភ្នំពេញ៖ យោងតាមសេចក្តីប្រកាសរបស់រដ្ឋបាលខណ្ឌច្បារអំពៅ នៅថ្ងៃទី២៣ ខែកញ្ញានេះបានជូនដំណឹងថា សូមបងប្អូនប្រជាពលរដ្ឋទាំងអស់ដែលបានធ្វើដំណើរទៅកាន់បិណ្ឌ១ នៅវត្តចំំពុះក្អែកទាំងអស់ សូមរួសរាន់ទៅយកសំណាកធ្វើតេស្តរកវីរុសកូវីដ-១៩។ បើតាមការបញ្ជាក់ពីរដ្ឋបាលខណ្ឌច្បារអំពៅដដែលបានឱ្យដឹងថា នៅវត្តចំពុះក្អែក ស្ថិតក្នុងសង្កាត់ព្រែកថ្មី ខណ្ឌច្បារអំពៅ មានការរកឃើញអ្នកវិជ្ជមានកូវីដ-១៩ នៅក្នុងទីតាំងវត្តខាងលើនេះ។

ចំពោះទីតាំងយកសំណាក បងប្អូនអាចធ្វើដំណើរទៅកាន់មជ្ឈមណ្ឌលកោះពេជ្រ នៅទីតាំងក្រោយកោះពេជ្រ ស៊ីធីហល (City Hall)​ ជារៀងរាល់ថ្ងៃ ចាប់ពីវេលាម៉ោង ៨ព្រឹក ដល់ម៉ោង ៥ល្ងាច។ ដោយឡែក បងប្អូនប្រជាពលរដ្ឋទាំងអស់ក៏អាចស្ម័គ្រចិត្តទៅយកសំណាករកកូវីដ-១៩ ដោយខ្លួនឯងបាននៅតាមបណ្តាទីតាំងដែលរៀបចំដោយក្រុមគ្រូពេទ្យស្មគ្រ័ចិត្តសម្ដេចតេជោ (TYDA) នៅតាមបណ្តាទីតាំងផ្សេងៗមួយចំនួនទៀតដូចជា៖ មជ្ឈមណ្ឌលម៉ូឌែន ៥ (Modern 5), វិហារយេស៊ូ​ ច្រមុះជ្រូកស្ទឹងមានជ័យ, វិវិហារយេស៊ូ ទល់មុខបណ្ណាល័យ​ ហ៊ុន​ សែន សាកលវិទ្យាល័យភូមិន្ទភ្នំពេញ (RUPP), សាលាបឋមសិក្សាកន្ទោ​ក ស្ថិតក្នុងខណ្ឌកំបូល និងទីលានកាប់គោ​ ភូមិព្រៃទា។

ជាមួយ​គ្នា​នេះ​ រដ្ឋបាលសង្កាត់ព្រែកថ្មីបញ្ជាក់ថា​ ពលរដ្ឋ​ដែលបានចូលរួម និងធ្វើដំណើរ មកកាន់បិណ្ឌ១ និងបិណ្ឌ២ នាថ្ងៃទី២១ និង២២ ខែកញ្ញា ឆ្នាំ២០២១ នៅក្នុងវត្តមុនីសុវណ្ណ ហៅវត្តចំពុះក្អែក ដែលស្ថិតក្នុងភូមិចំពុះក្អែក សង្កាត់ព្រែកថ្មី ខណ្ឌច្បារអំពៅ​ សូមរូតរះទៅយកសំណាកដោយខ្លួនឯងផ្ទាល់ឲ្យបានគ្រប់ៗគ្នា និងតាមដានបន្តអាការៈរបស់ខ្លួន និងរាល់បញ្ហានានាអាចទាក់ទងទៅកាន់ប្រព័ន្ធទូរសព្ទបន្ទាន់របស់ក្រសួងសុខាភិបាលលេខ ១១៥៕