ហ្វីលីពីន៖ សមាជប្រជុំសភាជាន់ទាបរបស់ហ្វីលីពីន បានអនុម័តលើការប្រមូលពន្ធអាករលើតម្លៃបន្ថែម (VAT) ទៅលើក្រុមហ៊ុនបច្ចេកវិទ្យាយក្សធំៗដែលមានវត្តមានលើទីផ្សាររបស់ហ្វីលីពីន រួមមានដូចជា YouTube, Facebook, Google និង Netflix ជាដើម។

ជាមួយសំឡេងគាំទ្រចំនួន ១៦៧ សំឡេងជំទាស់ចំនួន ៦ និងអនុប្បវាទចំនួន ១ ក្រុមការងារតាក់តែងច្បាប់របស់ហ្វីលីពីនបានអនុម័តជាលើកទី៣ និងជាការអនុម័តលើកចុងក្រោយស្តីពីសេចក្តីព្រាងច្បាប់នៃអាករលើតម្លៃបន្ថែម (VAT) រាល់ប្រតិបត្តិការឌីជីថលទាំងអស់ជាមួយបណ្តាក្រុមហ៊ុនបច្ចេកវិទ្យាយក្សទាំងនេះនៅក្នុងប្រទេសហ្វីលីពីន។

នៅខែកក្កដាឆ្នាំ ២០២០ គណៈកម្មាធិការសភាជាន់ទាបបានអនុម័តច្បាប់នេះ​ ដែលរដ្ឋាភិបាលនឹងកំណត់ពន្ធលើក្រុមហ៊ុនដែលផ្តល់សេវាកម្មឌីជីថលឬទំនិញតាមរយៈប្រព័ន្ធអនឡាញ ដែលច្បាប់នេះក៏បានបញ្ជូនទៅកាន់ព្រឹទ្ធសភាដើម្បីពិនិត្យសម្រេចរួចរាល់ដែរ។ ច្បាប់នេះត្រូវបានគេរំពឹងថានឹងអាចប្រមូលនូវចំណូលពន្ធប្រមាណ ២៩ពាន់លានប៉េសូ (ប្រមាណ ៥៧៩លានដុល្លារអាមេរិក) ដែលអាចនឹងជួយសម្រាលបន្ទុកមួយផ្នែករបស់រដ្ឋាភិបាលហ្វីលីពីន អំឡុងផលប៉ះពាល់ផ្នែកសេដ្ឋកិច្ចដែលបណ្តាលមកពីវីរុសកូវីដ-១៩។

គួរដឹងថា ហ្វីលីពីនហាក់ជាទីផ្សារធំមួយដែលមានការរីកចំរើនយ៉ាងឆាប់រហ័ស សម្រាប់ក្រុមហ៊ុនបច្ចេកវិទ្យាយក្សធំៗរបស់ពិភពលោក​ ខណៈយុវជនរបស់ហ្វីលីពីនមានទំនោរយ៉ាងខ្លាំងក្លាលើការប្រើប្រាស់បណ្តាញសង្គម។ យ៉ាងណាក្តី ក្រុមហ៊ុនធំៗដូចជា Facebook, Netflix និង Google ជាដើមមិនទាន់មានការឆ្លើយតបណាមួយជុំវិញបញ្ហានេះទេ៕