ភ្នំពេញ៖ នាយករដ្ឋមន្ត្រីកម្ពុជា សម្ដេចតេជោ ហ៊ុន សែន បានជំរុញដល់ឪពុកម្ដាយដែលមានកូនអាយុពី៦ ដល់១២ឆ្នាំ ឱ្យនាំពួកគេទៅចាក់វ៉ាក់សាំងការពារជំងឺកូវីដ-១៩ ឱ្យបានគ្រប់គ្នា។
ប្រទេសកម្ពុជាបានបើកយុទ្ធនាការចាក់វ៉ាក់សាំងដល់កុមារដែលមានអាយុពី៦ ដល់១២ឆ្នាំ នៅថ្ងៃទី១៧ ខែកញ្ញា ឆ្នាំ២០២១។
សម្ដេចតេជោ បានជំរុញបែបនេះ ដោយភ្ជាប់ជាមួយវីដេអូកុមារីណាណា ដែលទើបនឹងចាក់វ៉ាក់សាំងរួចបាននិយាយ ថ្លែងអំណរគុណដល់សម្ដេចតេជោ និងសម្ដេចកិត្តិព្រឹទ្ធបណ្ឌិត ដែលបានស្វះស្វែងរកវ៉ាក់សាំងមកចាក់ជូនកុមារដោយឥតគិតថ្លៃ។
សម្ដេចតេជោបានសរសេរថា៖ « ថ្ងៃនេះ ចៅណាណា បានចាក់វ៉ាក់សាំងការពារជំងឺកូវីដ-១៩ រួចហើយ។ ទន្ទឹមនឹងនេះដែរ សូមឪពុកម្តាយដែលមានកូនអាយុចាប់ពី៦ឆ្នាំ ដល់១២ឆ្នាំ សូមនាំកូនទៅចាក់វ៉ាក់សាំងការពារកូវីដ-១៩ អោយបានគ្រប់ៗគ្នាកុំបីខាន។ តាសូមជូនពរចៅណាណា និងចៅៗទូទាំងប្រទេសដែលបានចាក់វ៉ាក់សាំងរួចហើយមានសុខភាពល្អ ជៀសផុតពីជំងឺកូវីដ-១៩ គ្រប់ៗគ្នា » ។
គិតមកដល់ថ្ងៃទី១៩ ខែកញ្ញា ឆ្នាំ២០២១នេះ កម្ពុជាចាក់វ៉ាក់សាំងការពារជំងឺកូវី-១៩ដល់កុមារដែលមានអាយុពី៦ ដល់១២ឆ្នាំ បានចំនួនជាង៤៩ម៉ឺននាក់ ដែលស្មើនឹងប្រមាណ២៦ភាគរយបើធៀបនឹងកុមារគោលដៅជិត២លាននាក់៕
