ភ្នំពេញ៖ នាយករដ្ឋមន្ត្រីកម្ពុជា សម្ដេចតេជោ ហ៊ុន សែន និងសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន មានសុខភាពល្អធម្មតាក្រោយពេលចាក់វ៉ាក់សាំងដូសទី៣នៅថ្ងៃនេះ។

សម្ដេចតេជោ ហ៊ុន សែន បានសរសេរក្នុងហ្វេសបុកផេករបស់សម្ដេចថា៖ «បន្ទាប់ពីចាក់វ៉ាក់សាំងដូសទី៣ឬដូសជម្រុញរយៈពេល១០ម៉ោងកន្លងមកនេះសុខភាពខ្ញុំល្អណាស់មិនមានអ្វីប្លែកក្នុងខ្លួននោះឡើយ។ខ្ញុំនៅធ្វើការដោយពិនិត្យនិងចុះហត្ថលេខាលើឯកសារជាធម្មតា។ អ្វីដែលខុសពីធម្មតាគឺគ្រូពេទ្យមិនយល់ព្រមឱ្យខ្ញុំហាត់ប្រាណតាមការស្នើសុំរបស់ខ្ញុំ។ខ្ញុំត្រូវស្តាប់គ្រូពេទ្យដោយរង់ចាំហាត់ប្រាណនៅថ្ងៃស្អែកវិញ»។

សម្តេចតេជោ បានបញ្ជាក់ថា ភរិយារបស់សម្តេចគឺមានសុខភាពកាន់តែប្រសើរព្រោះក្រោយការចាក់វ៉ាកសាំងភ្លាម សម្តេចកិត្តិព្រឹទ្ធិបណ្ឌិត ប៊ុន រ៉ានី ហ៊ុនសែន បានធ្វើដំណើរទៅសែនជូនឪពុក ម្តាយជីដូនជីតាព្រោះថ្ងៃនេះជាថ្ងៃសីល

គួរបញ្ជាក់ផងដែរ សម្ដេចតេជោនិងសម្ដេចកិត្តិព្រឹទ្ធបណ្ឌិតបានទទួលចាក់វ៉ាក់សាំងលើកទី២ កាលពីថ្ងៃទី៤ ខែ មីនាកន្លងទៅ ដែលគិតរហូតមកដល់ពេលនេះគឺមានរយៈពេលជាង៦ខែហើយ។

គិតរហូតមកដល់ថ្ងៃនេះមានពលរដ្ឋកម្ពុជាប្រមាណ ៧៨ម៉ឺននាក់បានទទួលវ៉ាក់សាំងជំនួយបន្ថែមដូសទី៣នេះ។

ក្នុងជំនួបជាមួយរដ្ឋមន្ត្រីការបរទេសចិនកាលពីថ្ងៃទី១២ ខែកញ្ញាកន្លងទៅ តាមរយៈការស្នើសុំពីសម្ដេចតេជោ ប្រទេសចិនបានសម្រេចផ្ដល់វ៉ាក់សាំង៣លានដូសបន្ថែមសម្រាប់ជាដូសជំនួយចាក់ជូនដោយឥតគិតថ្លៃដល់ពលរដ្ឋកម្ពុជា ដែលធ្វើឱ្យចំនួនវ៉ាក់សាំងសម្រាប់ដូសជំនួយលើកទី៣របស់កម្ពុជា មានចំនួន៩លានដូស។ បើធៀបទៅនឹងពលរដ្ឋដែលត្រូវទទួលវ៉ាក់សាំងជំនួយ១២លាននាក់ កម្ពុជាខ្វះតែ៣លានដូសទៀតប៉ុណ្ណោះ៕