នាយករដ្ឋមន្ត្រីកម្ពុជាថា អ្នកសេដ្ឋកិច្ចក្រៅប្រព័ន្ធជាអាទិភាពនៃការចាក់វ៉ាក់សាំងដូសទី៣ នាខែក្រោយ
ភ្នំពេញ៖ នាយករដ្ឋមន្ត្រីកម្ពុជា សម្ដេចតេជោ ហ៊ុន សែន ចាត់ទុកអ្នកធ្វើការក្នុង សេដ្ឋកិច្ចក្រៅប្រព័ន្ធ ជាអ្នកមានអទិភាពបន្ទាប់ក្នុងការចាក់វ៉ាក់សាំងការពារជំងឺកូវីដ-១៩។
សម្ដេចតេជោ បានឆ្លើយតបទៅ នឹង សារមួយក្នុងទំព័រហ្វេសបុកដែលស្នើសុំទៅសម្ដេច ជួយឱ្យអ្នករត់កង់បីឆាប់បានទទួលវ៉ាក់សាំង ដោយសារពួកគេចង់បានទទួលវ៉ាក់សាំងជំនួយបន្ថែមថែមទៀតដើម្បីការពារជំងឺកូវីដ-១៩។
ជាការឆ្លើយតប សម្ដេចតេជោ បានសរសេរថា៖ «យើងនឹងខិតខំចាក់ដោយចាប់ផ្ដើមពីរាជធានីភ្នំពេញនៅក្នុងខែតុលា ២០២១នេះ។ បងប្អូនកង់បី និងសេដ្ឋកិច្ចក្រៅប្រព័ន្ធជាអទិភាពនៃការចាក់ជូនឱ្យបានឆាប់»។
ប្រធានសមាគមរួមគ្នាដើម្បីអភិវឌ្ឍន៍កម្ពុជា និងជាប្រធានចលនាសេដ្ឋកិច្ចក្រៅប្រព័ន្ធរាជធានីភ្នំពេញ លោក ឯ សុភាស់ គាំទ្រចំពោះការលើកឡើងរបស់សម្ដេចតេជោ ដោយថាអ្នកដែលធ្វើការក្នុងវិស័យសេដ្ឋកិច្ចក្រៅប្រព័ន្ធមានហានិភ័យខ្ពស់ និងការប្រឈមខ្លាំងក្នុងការប្រកបកិច្ចការប្រចាំថ្ងៃរបស់ពួកគេ។
លោកថា៖ «ព្រោះពួកគាត់ (អ្នកធ្វើការសេដ្ឋកិច្ចក្រៅប្រព័ន្ធ) នៅប្រកបរបរប្រចាំថ្ងៃជាមួយប្រជាពលរដ្ឋ ខ្ញុំយល់ថាការយកចិត្តទុកដាក់របស់សម្ដេចគឺល្អណាស់!»
បច្ចុប្បន្ន កម្ពុជាបានចាប់ផ្ដើមយុទ្ធនាការចាក់វ៉ាក់សាំងដូសជំរុញ ឬដូសទី៣ ទៅកាន់ក្រុមដែលមានអទិភាព អ្នកធ្វើការជួរមុខ ដែលមានដូចជាក្រុមគ្រូពេទ្យ មន្ត្រីរាជការ និងពលរដ្ឋរស់នៅតាមតំបន់ព្រំដែនថៃ ដែលមានចំនួនពី៥០ម៉ឺន ដល់១លាននាក់។
គិតរហូតមកដល់ថ្ងៃនេះមានពលរដ្ឋកម្ពុជាប្រមាណ ៧៨ម៉ឺននាក់បានទទួលវ៉ាក់សាំងជំនួយបន្ថែមដូសទី៣នេះ៕
