អាហ្វហ្គានីស្ថាន៖ នៅថ្ងៃអាទិត្យ ទី១២ ខែកញ្ញាម្សិលមិញនេះ រដ្ឋមន្រ្តីការបរទេសកាតា លោក Mohammed bin Abdulrahman Al-Thani បានជួបពិភាក្សាគ្នាជាមួយនាយករដ្ឋមន្រ្តីថ្មីរបស់ក្រុមតាលីបង់ នៅក្នុងជំនួបពិភាក្សាការបរទេសជាន់ខ្ពស់មួយ ក្នុងអំឡុងការធ្វើទស្សនកិច្ចការទូតរបស់កាតា ទៅកាន់រដ្ឋធានីកាប៊ុល ប្រទេសអាហ្វហ្គានីស្ថានជាលើកដំបូង ចាប់តាំងពីក្រមតាលីបង់បានចូលគ្រប់គ្រងការងារដឹកនាំប្រទេសអាហ្វហ្គានីស្ថាននាខែសីហាកន្លងទៅ។
ក្រសួងការបរទេសកាតាបានលើកឡើងថា នៅក្នុងជំនួបទ្វេរភាគីរវាងរដ្ឋមន្រ្តីការបរទេសកាតា ជាមួយលោក Mullah Muhammad Hasan Akhund ដែលជានាយករដ្ឋមន្រ្តីថ្មីដែលទើបកាន់អំណាច ភាគីកាតាបានស្នើ និងលើកទឹកចិត្តឱ្យមាន "ការចូលរួមពីគ្រប់ភាគីទាំងអស់របស់អាហ្វហ្គានីស្ថានក្នុងការផ្សះផ្សា និងបង្រួបបង្រួមជាតិ"។
កន្លងមក កាតាត្រូវបានគេដឹងថាជាប្រទេសដែលបង្ហាញការគាំទ្រ និងមានឥទ្ធិពលចំពោះក្រុមតាលីបង់ និងបានដើរតួយ៉ាងសំខាន់ក្នុងចលនានៃការឈរជើងបាននៃក្រុមសកម្មប្រយុទ្ធមួយនេះ។ ជាក់ស្តែង ទីក្រុងដូហា នៃរាជាណាចក្រកាតា គឺជាមូលដ្ឋាននយោបាយដ៏សំខាន់របស់ក្រុមតាលីបង់នាពេលកន្លងមក ដែលជាទីតាំងនៃជំនួបកិច្ចចរចារវាងក្រុមតាលីបង់ជាមួយសហរដ្ឋអាមេរិកកន្លងមក ដែលរហូតឈានដល់មានការដកកងកម្លាំងទ័ពរបស់អាមេរិកចេញពីទឹកដីអាហ្វហ្គានីស្ថានផងដែរ។
អ្នកនាំពាក្យក្រុមតាលីបង់បានបញ្ជាក់ថា ក្រៅពីជំនួបជាមួយមេដឹកនាំកំពូលអាហ្វហ្គានីស្ថាន រដ្ឋមន្រ្តីការបរទេសកាតាក៏បានជួបប្រជុំទ្វេរភាគីជាមួយរដ្ឋមន្រ្តី និងថ្នាក់ដឹកនាំជាន់ខ្ពស់់ជាច្រើនផ្សេងទៀត ដែលទើបចូលកាន់តំណែងក្នុងជួររដ្ឋាភិបានអាហ្វហ្គានីស្ថានកាលពីពេលថ្មីៗ។ ក្រុមតាលីបង់ក៏បានអះអាងថា នៅក្នុងជំនួបទស្សនកិច្ចផ្លូវការនេះផ្តោតទៅលើ ទំនាក់ទំនងទ្វេភាគីប្រទេសទាំងពីរ, ជំនួយលើផ្នែកមនុស្សធម៌, ការអភិវឌ្ឍន៍សេដ្ឋកិច្ចក្នុងប្រទេស និងសមាហរណកម្មជាមួយបណ្តាភាគីផ្សេងៗលើឆាកអន្តរជាតិ៕
នាយករដ្ឋមន្រ្តីអាហ្វហ្គានីស្ថាន លោក Mullah Muhammad Hasan Akhund
ព័ត៌មានជាច្រើនទៀតសម្រាប់អ្នក
