អង់គ្លេស៖ ក្របខណ្ឌ English Premier League បានសម្រេចអនុញ្ញាតឱ្យកីឡាករដែលក្លិបរបស់ពួកគេមុនអនុញ្ញាតឱ្យចូលរួមការប្រកួតក្នុងវគ្គជម្រុះ World Cup (តំបន់អាមេរិកខាងត្បូង) ជាពិសេសកីឡាករដែលគ្រោងធ្វើដំណើរទៅកាន់ប្រទេសមួយចំនួនដូចជាប្រេស៊ីល, ម៉ិកស៊ិក និងឈីលីជាដើម អាចចូលលេងឱ្យក្រុមរៀងៗខ្លួនបានសម្រាប់ការប្រកួតនៅចុងសប្តាហ៍នេះ ក្រោយមានការគំរាមកំហែងពីការដាក់បំរាមរយៈពេល ៥ថ្ងៃកន្លងមក។

Manchester United, Manchester City, Liverpool និង Chelsea គឺជាក្លិបដែលស្ថិតក្នុងការរងបំរាមនាពេលកន្លងមកពាក់ព័ន្ធនឹងការហាមឃាត់មិនឱ្យកីឡាកររបស់គេទៅលេងឱ្យក្រុមជម្រើសជាតិ ដែលជាប្រទេសស្ថិតក្នុងបញ្ជីក្រហមរបស់ចក្រភពអង់គ្លេស ដោយផ្អែកលើការព្រួយបារម្ភចំពោះការអវត្តមានរយៈពេលវែងដោយការចត្តាឡីស័កតាមវិធានការសុខាភិបាលរបស់អង់គ្លេសពេលត្រឡប់មកវិញ។

សេចក្តីសម្រេចនេះត្រូវបានធ្វើឡើងដោយផ្អែកលើសញ្ញាណវិជ្ជមាននៃកិច្ចសន្ទនារវាងថ្នាក់ដឹកនាំរបស់ FIFA ជាមួយរដ្ឋាភិបាលអង់គ្លេស ដែលសំដៅទៅលើការបង្កើននូវទំនាក់ទំនងល្អ និងកិច្ចយោគយល់សម្រាប់ការប្រកួតអន្តរជាតិដែលនឹងឈានចូលមកដល់នាខែតុលាខាងមុខនេះសាជាថ្មី។

ភាគីសំខាន់ៗចំនួន ៣ រួមមាន FIFA នឹង FA អង់គ្លេស និង Premier League បាននឹងកំពុងធ្វើការរួមគ្នាទៅលើការដាក់សំណើរនាយករដ្ឋមន្រ្តី និងរដ្ឋាភិបាលអង់គ្លេសសម្រាប់ដំណោះស្រាយណាមួយចំពោះការអនុវត្តទៅលើកីឡាករដែលនឹងត្រូវធ្វើដំណើរទៅកាន់បណ្តាប្រទេសបញ្ជីក្រហមសម្រាប់ការប្រកួតអន្តរជាតិនាពេលខាងមុខ ឱ្យទទួលបានការលើកលែង ឬបន្ធូរបន្ថយក្នុងលក្ខខណ្ឌណាមួយពាក់ព័ន្ធនឹងវិធានការសុខាភិបាលកូវីដ-១៩៕