ភ្នំពេញ, (EAC News) — សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា និងជាប្រធានគណបក្សប្រជាជនកម្ពុជា (CPP) នៅថ្ងៃពុធនេះ បានចេញសារដ៏មានអត្ថន័យយ៉ាងជ្រាលជ្រៅមួយ ដើម្បីរំឭកខួបលើកទី៤៧ នៃទិវាជ័យជម្នះ ៧មករា ដែលជាព្រឹត្តិការណ៍ប្រវត្តិសាស្ត្រនៃការផ្ដួលរំលំរបបប្រល័យពូជសាសន៍ប៉ុលពត។ សារនោះបានសង្កត់ធ្ងន់លើដំណើរវិវត្តរបស់កម្ពុជា ចាប់ពីការរំដោះរបបដ៏ឃោរឃៅនោះបានរលំរហូតដល់ការអភិវឌ្ឍប្រកបដោយចីរភាព ព្រមទាំងបានលើកឡើងពីបញ្ហាប្រឈមក្នុងតំបន់ ជាពិសេសភាពតានតឹងព្រំដែនជាមួយប្រទេសថៃ។

ក្នុងសេចក្ដីថ្លែងការណ៍ចុះថ្ងៃទី៧ ខែមករា ឆ្នាំ២០២៦ សម្តេចតេជោហ៊ុន សែន បានហៅជ័យជម្នះឆ្នាំ១៩៧៩ ថាជាកំណើតនៃ "សករាជថ្មីសម្រាប់កម្ពុជា៖ ឯករាជ្យ សេរីភាព ប្រជាធិបតេយ្យ និងវឌ្ឍនភាពសង្គម"។ លោកបានអំពាវនាវឲ្យចងចាំជានិច្ចនូវឧក្រិដ្ឋកម្មរបស់របបប៉ុលពត ដែលបានបណ្ដាលឱ្យប្រជាជនរាប់លាននាក់ស្លាប់ក្នុងរយៈពេល៣ឆ្នាំ ៨ខែ និង២០ថ្ងៃ ពីថ្ងៃទី១៧ ខែមេសា ឆ្នាំ១៩៧៥ រហូតដល់ថ្ងៃទី៧ ខែមករា ឆ្នាំ១៩៧៩។

សម្តេចតេជោ ហ៊ុន សែន បានថ្លែងថា៖ "យើងពិតជាមិនអាចបំភ្លេចបានឡើយនូវមហាសោកនាដកម្មរបស់ប្រជាជនដែលបង្កឡើងដោយបនប្រល័យពូជសាសន៍ប៉ុលពត «ដោយរំឭកថាប្រជាជនកម្ពុជាត្រូវបានដកហូតសិទ្ធិសេរីភាព ត្រូវបានបង្ខំឱ្យធ្វើការដូចសត្វធាតុ រងទារុណកម្ម និងការកាប់សម្លាប់យ៉ាងព្រៃផ្សៃបំផុត ដែលបានរុញច្រានប្រទេសជាតិ "ឈានដល់មាត់រណ្ដៅនៃការរលាយសូន្យ»។ សម្តេចតេជោ បានកោតសរសើរចំពោះរណសិរ្សសាមគ្គីសង្គ្រោះជាតិកម្ពុជា ដែលបានបង្កើតឡើងនៅថ្ងៃទី២ ខែធ្នូ ឆ្នាំ១៩៧៨ និង «ការជួយឧបត្ថម្ភដ៏ធំធេងរបស់កងទ័ពស្ម័គ្រចិត្តវៀតណាម» ក្នុងការផ្ដួលរំលំរបបដ៏ឃោរឃៅនេះ។

សម្តេចតេជោ ហ៊ុន សែន បានគូសបញ្ជាក់ពីសមិទ្ធផលនានារបស់កម្ពុជាក្រោយឆ្នាំ១៩៧៩ រួមមាន ការបញ្ចប់សង្គ្រាមរ៉ាំរ៉ៃ ការកសាងលទ្ធិប្រជាធិបតេយ្យដ៏រឹងមាំ និងការអភិវឌ្ឍសេដ្ឋកិច្ចយ៉ាងឆាប់រហ័ស ដែលបានលើកកម្ពស់ជីវភាពរស់នៅរបស់ប្រជាជន។ សម្តេចតេជោបានសន្មតសមិទ្ធផលទាំងនេះទៅលើភាពជាអ្នកដឹកនាំរបស់គណបក្សប្រជាជនកម្ពុជា សាមគ្គីភាពរបស់ប្រជាជន និងការគាំទ្រពីអន្តរជាតិ។

ក្រឡេកមើលទៅឆ្នាំ២០២៥ សម្តេច ហ៊ុន សែន បានកត់សម្គាល់ថា កម្ពុជាសម្រេចបាន «សមិទ្ធផលជាច្រើនលើគ្រប់វិស័យ» តាមរយៈការអនុវត្តកម្មវិធីនយោបាយ និងយុទ្ធសាស្ត្របញ្ចកោណដំណាក់កាលទី១ របស់រាជរដ្ឋាភិបាល ដែលដឹកនាំដោយ សម្តេចមហាបវរធិបតី ហ៊ុន ម៉ាណែត។ សម្តេចតេជោបានបញ្ជាក់ថា ឆ្នាំ២០២៦ ដែលជាឆ្នាំទី៣ នៃអាណត្តិរដ្ឋាភិបាលបច្ចុប្បន្ន នឹងបន្តអនុវត្តកម្មវិធីនយោបាយ និងការពារប្រជាជន ព្រមទាំងបូរណភាពទឹកដី។

សារនោះក៏បានលម្អិតអំពីការវិវត្តដ៏ស្មុគស្មាញនៃសភាពការណ៍អន្តរជាតិ ភាពមិនច្បាស់លាស់នៃសេដ្ឋកិច្ចសកល និង «ការចុះខ្សោយនៃសណ្តាប់ធ្នាប់អន្តរជាតិផ្អែកលើច្បាប់» ដែលបានជះឥទ្ធិពលដល់ដំណើរការអភិវឌ្ឍរបស់កម្ពុជា។ សម្តេចតេជោ ហ៊ុន សែន បានលើកឡើងពីអ្វីដែលលោកហៅថា «ការឈ្លានពានយ៉ាងឃោរឃៅរបស់ថៃ» មកលើបូរណភាពទឹកដីកម្ពុជានៅតាមបណ្ដោយព្រំដែន។ សម្តេចតេជោបានអះអាងថា កងទ័ពថៃបានបើកការវាយប្រហារលើទ័ពកម្ពុជា និងគោលដៅស៊ីវិល ដែលរំលោភលើអធិបតេយ្យភាពកម្ពុជា ច្បាប់មនុស្សធម៌អន្តរជាតិ និងស្មារតីអាស៊ាន។

ជាការឆ្លើយតប កងកម្លាំងប្រដាប់អាវុធកម្ពុជាបានប្រើប្រាស់សិទ្ធិការពារខ្លួន ខណៈរាជរដ្ឋាភិបាលប្រកាន់ជំហរ «អត់ធ្មត់ប្រកបដោយសុច្ឆន្ទៈ និងភាពស្មោះត្រង់» ក្នុងការស្វែងរកដំណោះស្រាយដោយសន្តិវិធី។ សម្តេចតេជោ ហ៊ុន សែន បានកត់សម្គាល់ថា ទោះបីមានកិច្ចព្រមព្រៀងបទឈប់បាញ់នៅថ្ងៃទី២៨ ខែកក្កដា ឆ្នាំ២០២៥ និងសេចក្ដីថ្លែងការណ៍រួមទីក្រុងកូឡាឡាំពួ នៅថ្ងៃទី២៦ ខែតុលា ឆ្នាំ២០២៥ ក៏ដោយ ក៏ភាគីថៃនៅតែបន្តពង្រីកការវាយប្រហារ។

សម្តេចតេជោ បានបញ្ជាក់ផងដែលការឯកភាពកិច្ចព្រមព្រៀងបទឈប់បាញ់ភ្លាមនៅនឹងកន្លែង ដែលសម្រេចបាននៅថ្ងៃទី២៧ ខែធ្នូ ឆ្នាំ២០២៥ ក្នុងកិច្ចប្រជុំពិសេសលើកទី៣ នៃគណៈកម្មាធិការព្រំដែនទូទៅ (GBC) រវាងព្រះរាជាណាចក្រទាំងពីរ។ កិច្ចព្រមព្រៀងនេះ ដែលមានប្រសិទ្ធភាពចាប់ពីម៉ោង១២:០០ថ្ងៃត្រង់ ថ្ងៃទី២៧ ខែធ្នូ ឆ្នាំ២០២៥ មក មានគោលបំណង «បញ្ឈប់អរិភាពគ្រប់ទម្រង់» និងស្ដារទំនុកចិត្ត ភាពប្រក្រតី និងសន្តិភាពយូរអង្វែងតាមបណ្ដោយព្រំដែន។

សម្តេចតេជោ ហ៊ុន សែន បានអះអាងឡើងវិញនូវការប្តេជ្ញាចិត្តរបស់កម្ពុជាក្នុងការបញ្ចប់ទុក្ខវេទនា និងសម្រេចសន្តិភាពប្រកបដោយចីរភាព ដោយបញ្ជាក់ថា ប្រទេសជាតិ «នឹងមិនធ្វើសម្បទាននូវអធិបតេយ្យ ឬសេចក្ដីថ្លៃថ្នូររបស់ខ្លួនឡើយ»។ សម្តេចតេជោបានថ្លែងអំណរគុណយ៉ាងជ្រាលជ្រៅចំពោះបណ្ដាប្រទេសជាមិត្ត និងសហគមន៍អន្តរជាតិ រួមមាន សហរដ្ឋអាមេរិក សាធារណរដ្ឋប្រជាមានិតចិន និងបណ្ដាប្រទេសជាសមាជិកអាស៊ាន (ដោយមានម៉ាឡេស៊ីជាប្រធាន) ចំពោះការជួយឧបត្ថម្ភចាប់តាំងពីកិច្ចព្រមព្រៀងបទឈប់បាញ់ថ្ងៃទី២៨ ខែកក្កដា ឆ្នាំ២០២៥។

សម្តេច ហ៊ុន សែន បានអំពាវនាវដល់បងប្អូនជនរួមជាតិទាំងអស់ឱ្យបន្តលើកកម្ពស់ស្មារតីស្នេហាជាតិ ភាពម្ចាស់ការ និងសាមគ្គីភាពក្រោមបាវចនា "ជាតិ សាសនា ព្រះមហាក្សត្រ" ដើម្បីការពារមរតកវប្បធម៌ និងអធិបតេយ្យភាព។ លោកបានសម្តែងជំនឿចិត្តថា ដោយមានឯកភាពជាតិ កម្ពុជានឹងជំនះរាល់ឧបសគ្គទាំងអស់៕